Roma Urraco ники остида танилган россиялик машҳур блогер навбатдаги топилма видеоси билан бўлишди. Бу сафар у 1994 йилда ишлаб чиқарилган ва ҳозирга қадар рекорд даражада кам масофа босган — 17 километр — «ZAZ-965М» моделига дуч келган. Мазкур «Запорожец» 25 йил давомида Львовдаги гаражда ҳаракатсиз турган, деб хабар беради Motor.
Узоқ вақт қаровсиз қолиб кетган «Запорожец»нинг аҳволига ҳавас қилиб бўлмайди. Кузови коррозияга учрамаган бўлса-да, чорак асрлик чанг остида қолган автомобиль таг қисмидан ёғоч тўсинлар билан кўтариб қўйилган. Салон қисми яхши аҳволда: ўриндиқларни чанг босган, ойна ва қурилмалар панели эса бус-бутун.
«ZAZ-968М» 1979 йилнинг охирида серияли ишлаб чиқарила бошланган, сўнгги нусхаси эса 1994 йилнинг 15 апрелида конвейрдан чиққан. Модель ўзидан олдинги авлод — «ZAZ-968А»дан фарқли ўлароқ такомиллаштирилган тўғри бурчакли орқа фараларга, шунингдек, кенг юкхонага эга. Автомобиль модификацияга қараб 41, 45 ва 50 от кучига эга моторлар билан жиҳозланган.
Аввалроқ Украинанинг Херсон вилоятида жойлашган омборларнинг биридан деярли юрмаган «ZAZ-968М» топилгани, одометрга кўра, машина 71 километр масофа босгани тўғрисида хабар берилганди.
Изоҳ (0)