Roma Urraco niki ostida tanilgan rossiyalik mashhur bloger navbatdagi topilma videosi bilan bo‘lishdi. Bu safar u 1994-yilda ishlab chiqarilgan va hozirga qadar rekord darajada kam masofa bosgan — 17 kilometr — “ZAZ-965M” modeliga duch kelgan. Mazkur “Zaporojets” 25 yil davomida Lvovdagi garajda harakatsiz turgan, deb xabar beradi Motor.
Uzoq vaqt qarovsiz qolib ketgan “Zaporojets”ning ahvoliga havas qilib bo‘lmaydi. Kuzovi korroziyaga uchramagan bo‘lsa-da, chorak asrlik chang ostida qolgan avtomobil tag qismidan yog‘och to‘sinlar bilan ko‘tarib qo‘yilgan. Salon qismi yaxshi ahvolda: o‘rindiqlarni chang bosgan, oyna va qurilmalar paneli esa bus-butun.
“ZAZ-968M” 1979-yilning oxirida seriyali ishlab chiqarila boshlangan, so‘nggi nusxasi esa 1994-yilning 15-aprelida konveyrdan chiqqan. Model o‘zidan oldingi avlod — “ZAZ-968A”dan farqli o‘laroq takomillashtirilgan to‘g‘ri burchakli orqa faralarga, shuningdek, keng yukxonaga ega. Avtomobil modifikatsiyaga qarab 41, 45 va 50 ot kuchiga ega motorlar bilan jihozlangan.
Avvalroq Ukrainaning Xerson viloyatida joylashgan omborlarning biridan deyarli yurmagan “ZAZ-968M” topilgani, odometrga ko‘ra, mashina 71 kilometr masofa bosgani to‘g‘risida xabar berilgandi.
Izoh (0)