Ўзбекистон Президенти Шавкат Мирзиёев 22 июнь куни Қозоғистоннинг биринчи президенти – Элбоши Нурсултон Назарбоев билан телефон орқали мулоқот қилди. Бу ҳақда Президент матбуот хизмати хабар берди.
Маълум қилинишича, суҳбат аввалида Ўзбекистон Президенти Шавкат Мирзиёев Элбоши Нурсултон Назарбоевга тез орада тузалиб кетишини, мустаҳкам соғлик ва куч-қувват тилади.
Мулоқотда коронавирус инфекцияси тарқалишининг олдини олиш, шунингдек, Ўзбекистон ва Қозоғистоннинг жадал ривожланиб бораётган икки томонлама муносабатлари ва иқтисодиётларига пандемия оқибатларининг салбий таъсирини камайтириш борасида икки мамлакат ҳукуматлари томонидан биргаликда кўрилаётган чора-тадбирлар муҳокама қилинди. Бу борадаги саъй-ҳаракатларни мувофиқлаштиришни янада кучайтириш муҳим экани таъкидланди.
«Кўп асрлик дўстлик, яхши қўшничилик ва стратегик шериклик тамойилларига асосланган Ўзбекистон—Қозоғистон амалий ҳамкорлиги кенгайиб бораётгани мамнуният билан қайд этилди. Ўзаро манфаатли алоқаларнинг устувор йўналишларида қўшма лойиҳалар амалга оширилмоқда. Ўндан ортиқ янги лойиҳани амалга ошириш назарда тутилаётган саноат кооперациясини мустаҳкамлаш бўйича «йўл харитаси» маъқулланди», — дейилади хабарда.
Қайд этилишича, бўлажак учрашув ва тадбирлар режаси юзасидан ҳам фикр алмашилди. Мулоқот сўнгида икки давлат етакчилари Ўзбекистон ва Қозоғистон халқларига тинчлик, фаровонлик ва равнақ тилади.
Эслатиб ўтамиз, Нурсултон Назарбоевнинг коронвирусга чалингани маълум бўлгач, Шавкат Мирзиёев унга мактуб йўллаб, коронавирусдан тезроқ тузалишни тилаганди.
Аввалроқ Қозоғистон соғлиқни сақлаш вазири Елжан Биртановда ҳамда Олмаота вилояти ҳокими Омондиқ Баталовда коронавирус аниқлангани ҳақида хабар берилганди.
Сўнгги маълумотларга кўра, Қозоғистонда коронавирусга чалинганлар сони 17 732 кишига етган. Ҳозирга қадар 10 897 киши соғайган, 120 киши вирус қурбонига айланган.
Изоҳ (0)