Тошкент шаҳар Яшнобод туманида қиморхона ташкил қилган шахс ва унинг ходимлари фаолияти фош этилди. Бу ҳақда Тошкент шаҳар ИИББ маълум қилди.
Хабар берилишича, Тошкент шаҳар ИИББга пойтахтнинг Яшнобод туманидаги бильярд клубида қимор ўйинлари ташкил этилаётгани ҳақида хабар келиб тушган. Текширув натижасида мазкур маълумот тасдиқланди.
Мазкур клуб кўздан кечирилганда 52 ёшли раҳбар Б.А. қимор ўйинлари учун бинода алоҳида хона ажратгани маълум бўлди ва таваккалчиликка асосланган ўйинлар тизимли равишда ўтказилгани аниқланди.
Текширув давомида клубда покер ўйновчи олти киши ва клуб ишчиларидан уч киши — 48 ёшли М.И., 24 ёшли Д.Д. ва муқаддам судланган 25 ёшли Т.Ж. борлиги аниқланган.
Ашёвий далиллар сифатида 2700 доллар, 6 миллион сўм ва покер ўйини учун тошлар олинган.
Мазкур ҳолат бўйича Ўзбекистон Республикаси Жиноят кодексининг 278-моддаси (Қимор ва таваккалчиликка асосланган бошқа ўйинларни ташкил этиш ҳамда ўтказиш) бўйича жиноий иш қўзғатилди. Тергов давом этмоқда.
Мавзуга доир:
Изоҳ (0)