Сардобадаги сув тошқини туфайли жабрланган аҳолига ҳозирга қадар қанча нарса тарқатилгани маълум қилинди

Бош прокуратура Сардобадаги сув тошқини бўйича назорат тадбирлари давом эттирилаётгани, жабр кўрган аҳолига шу кунгача қанча нарса тарқатилгани тўғрисида маълумот берди.

Таъкидланишича, давлат раҳбарининг топшириғига асосан бош прокурор томонидан ишчи гуруҳлар тузилиб, уларга 300 га яқин прокуратура ходимлари жалб этилган. Прокуратурада тузилган ишчи гуруҳлар томонидан эвакуация қилинган аҳолининг ҳолидан мунтазам равишда хабар олиниб, кунлик маҳсулотларга бўлган эҳтиёж ўрганиб чиқилиши натижасида эвакуация қилинган ҳар бир фуқарога биринчи галда керак бўладиган маҳсулот турлари аниқлаштириб олинмоқда.

Маълумотларга кўра, яшаш жойларидан бошқа ҳудудларга эвакуация қилинган аҳолини ноозиқ-овқат маҳсулотларига бўлган эҳтиёжларини таъминлаш мақсадида ўтган давр мобайнида омборхоналарга 3,1 миллион донадан ортиқ шахсий ҳимоя ва гигиена воситалари, ётоқ ва бошқа уй-рўзғор буюмлари келиб тушган бўлса, улардан 2,743 миллионга яқини фуқароларга тарқатилган.

Шунингдек, 76 267 дона матрас, кўрпа ва ёстиқ, 134 133 дона совун ва кир ювиш воситалари, 83 594 дона шахсий гигиена воситалари, 1,798 миллион дона кийим-кечак, 570,7 минг дона тиббий буюмлар, 522 минг дона бошқа буюмлар келиб тушган.

Таъкидланишича, 5 июнь кунига қадар ушбу эҳтиёжлар тўлиқ бартараф этилган.

«Жиззах вилояти бўйича 174 та кир ювиш кукуни, 160 та совун, 176 та шампун, 162 та тиш пастаси, 192 та бир марталик соқол олиш воситаси, 188 та аёллар гигиеник воситалари, 199 та сочиқ, 25 та матрас ва кўрпа, Сирдарё вилояти бўйича 10 839 та кир ювиш кукуни, 14 138 та совун, 7 442 та шампун, 8 510 та тиш пастаси, 6 341 та бир марталик соқол олиш воситаси, 6 926 та аёллар гигиеник воситалари, 20 598 та памперс, 10 821 та сочиқ, 18 205 та кийим-кечак, 11 968 та оёқ кийими, 4 971 та ёстиқ, 9 640 та матрас ва кўрпа тарқатилди», — дейилади хабарда.

Шу кунга қадар омборхоналарга гуманитар ёрдам сифатида 16 та турдаги 2998 тоннадан ортиқ озиқ-овқат маҳсулотлари келиб тушган бўлиб, ушбу маҳсулотлар жабрланганларнинг эҳтиёжларини тезкор равишда ўрганиш орқали манзилли етказиб берилмоқда.

Бундан ташқари, ҳозирга қадар 59,6 тонна гўшт ва тайёр гўшт маҳсулотлари, 367,7 тонна ун ва 115,7 тонна макарон, 75,7 тонна шакар, 335,4 тонна гуруч, 73,6 тонна ўсимлик ёғи, 5,8 тонна сариёғ, 335,1 тонна картошка, 235,1 тонна сабзи, 266,4 тонна пиёз, 62,7 минг дона нон ва 287,5 минг дона тухум маҳсулотлари аҳолига етказиб берилган.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда. Бош прокуратура Сардоба фалокати юзасидан жиноят иши бўйича 4 та тергов версиясини кўриб чиқмоқда. Ҳозирда сув омбори иши бўйича икки киши қамоққа олинган. Сардоба тумани «Дўстлик» маҳалласида 37 та 1480 хонадонли; Мирзаобод тумани «Ҳақиқат» маҳалласида 20 та 800 хонадонли ва «Навбаҳор» маҳалласида 9 та 360 хонадонли кўп қаватли турар жой қурилиш ишлари бошланган.