Farg‘ona viloyati So‘x tumanida telekommunikatsiya infratuzilmasini kengaytirish va xizmatlar sifatini yaxshilash maqsadida 71 kilometr optik tolali aloqa kabellar, umumiy sig‘imi 560 portli zamonaviy qurilmalar, temir-beton ustunlar, 5 ta mobil aloqa baza stansiyalari yetkazildi. Bu haqda Axborot texnologiyalari va kommunikatsiyalarini rivojlantirish vazirligi axborot xizmati xabar berdi.
Hozirda modernizatsiya ishlari boshlangan kundan buyon jami 101 ta temir-beton ustunlar o‘rnatildi, 33 ta tuman zaxirasida mavjud aloqa ustunlari ko‘chirib o‘tkazilgan. So‘x tumanidagi ijtimoiy ahamiyatga ega 52 ta obyektlarga, 23 ta umumta’lim maktabi, 20 ta maktabgacha ta’lim muassasasi hamda 9 ta tibbiyot muassasasiga jami 71 kilometr optik tolali aloqa liniyalari tortilgan.
Ta’kidlanishicha, tumanda ko‘rsatilayotgan xizmatlar hajmini oshirish va sifatini yanada yaxshilash maqsadida jami 500 metr yerosti optik tolali aloqa liniyasi qurilgan. Mazkur qurilayotgan optik tolali magistral aloqa liniyasida 2 Gb/s aloqa kanallarini tashkil etish uchun qurilmalar o‘rnatilgan.
Ma’lum qilinishicha, tumanga yetkazilgan 5 ta mobil aloqa tayanch stansiyalarining barchasi “Lenburg” va “Chashma” MFY hududlarida hamda So‘x tuman markazida o‘rnatilib ishga tushirilgan. Bundan tashqari, “Cho‘ng‘ara” MFY hududida “O‘zbektelekom” AK Uzmobile filialining yuqori tezlikdagi internet texnologiyasi asosidagi tayanch stansiyasini o‘rnatish uchun qurilish-montaj ishlariga tayyorgarlik ko‘rilmoqda.
Uzmobile filialining tumandagi barcha tayanch stansiyalari yuqori tezlikdagi 4G standartiga xos internet texnologiyasi asosida modernizatsiya qilingan.
“Shuningdek, Lenburg—Chodak yo‘nalishida magistral transport tarmog‘ini kengaytirish maqsadida qo‘shimcha radiorele qurilmasi o‘rnatildi. Tuman markaziy shifoxonasi Farg‘ona shahridagi Sog‘liqni saqlash boshqarmasi o‘rtasida tegishli axborot tizimlari va dasturiy ta’minotlarni joriy etgan holda masofaviy tashxis ishlarini amalga oshirish uchun telemeditsina tizimi joriy etildi. Tuman Soliq inspeksiyasi binosiga qadar optik tolali aloqa liniyalar tortilgan bo‘lib, hozirda yuqori tezlikdagi internet xizmatini taqdim etish maqsadida keng polosali qurilma o‘rnatildi”, — deyiladi xabarda.
Belgilangan ishlarni amalga oshirish uchun bugungi kunda 45 nafar mutaxassis va ishchi xodimlar, shundan 20 nafar xodim So‘x tumani aholisidan shartnoma asosida jalb qilingan.
Avvalroq So‘xga elektr ta’minotini yaxshilash uchun turli quvvatdagi 16 dona transformator punkti, 79 kilometr uzunlikdagi zamonaviy elektr uzatish kabellari, 80 dona temir-beton tayanch, 1200 dan ortiq izolyator, 10 turdagi elektr qurilmalari yuborilgani, Farg‘ona viloyati hokimligi So‘x tumaniga xayriya karvoni jo‘natgani, 230 nafar so‘xlik Tashkent City’dagi qurilish ishlarida qatnashish uchun poytaxtga olib kelingani, So‘xda 3 ta dam olish maskani yaratilishi, viloyat markaziga aviaqatnovni yo‘lga qo‘yish rejalashtirilayotgani haqida xabarlar berilgan.
Izoh (0)