Ёшлар иттифоқининг Қашқадарёдаги масъули иттифоқ тадбирлари сон жиҳатидан кўплигини, аммо натижаси қониқарсизлигини тан олди

Ёшлар иттифоқининг Қашқадарё вилоят кенгаши раиси Дилшод Усмонов иттифоқчилар сон жиҳатидан кўп тадбир ўтказаётганини, аммо тадбирлар сифати ва натижаси қониқарсиз бўлаётганини тан олди, дея хабар берди «Дарё» мухбири.

Таъкидланишича, 20 июнь куни Қашқадарё вилоятининг Деҳқонобод туманида «Ёшлар ойлиги» доирасида вилоят ҳокими ўринбосари Рустам Йўлдошев ҳамда Ёшлар иттифоқи вилоят кенгаши масъуллари иштирокида матбуот анжумани ташкил этилган.

Анжуманда сўз олган иттифоқ масъули Улуғбек Султонов вилоятда ёшлар фаоллигини ошириш мақсадида кўплаб тадбирлар ўтказилаётганини, Президент томонидан илгари сурилган бешта ташаббус доирасида китобхонлик тарғиботи бўйича 77 маротаба онлайн танлов ўтказиш орқали 7345 нафар ёш қамраб олинганини айтиб ўтди.

Шунингдек, «Ёшлар ойлиги» доирасида «Ҳоким ва ёшлар» онлайн учрашуви олти маротаба ўтказилганини, учрашувда иштирок этган 232 нафар ўғил-қиз томонидан кўтарилган 47 та муаммонинг 30 таси жойида ҳал этилганини қўшимча қилди.

Масъулга кўра, «Ёшлар ойлиги» доирасида «Сенатор ва ёшлар», ҳоким, прокурор, сектор раҳбарлари ва ёшлар деб номланган сон жиҳатидан катта рақамларни кўрсатувчи учрашувлар орқали юзлаб ёшлар қамраб олинган.

Анжуманда сўз олган «Дарё» мухбири сон жиҳатидан катта рақамларни кўрсатувчи учрашувлар ва юзлаб ёшлар жалб қилинган тадбирлар натижаси билан қизиқди.

Саволга жавоб берган Ёшлар иттифоқи вилоят кенгаши раиси Дилшод Усмонов катта рақамлар ортидаги учрашувлар ва юзлаб ёшлар жалб қилинган тадбирлар сифати ва натижаси ўзини ҳам қониқтирмаслигини тан олди.

«Тўғри, сон жиҳатидан кўп бўлган тадбирларимиз сифати ва натижаси бизни ҳам қониқтирмайди», — деди Дилшод Усмонов.

Эслатиб ўтамиз, Ички ишлар вазирлиги ТАТУ талабалари, Ёшлар иттифоқи ва ёш волонтёрлар орасида «Ватанпарвар блогерлар» гуруҳини тузишни таклиф қилиб, Президент қарори лойиҳасини жамоатчилик муҳокамасига қўйганди. Ёшлар иттифоқи марказий кенгаши раиси Алишер Саъдуллаев ташкилотнинг ушбу лойиҳанинг ишлаб чиқилишига алоқаси йўқлигини билдириб, қарордаги банддан Ёшлар иттифоқини олиб ташлашни сўраган эди.