Тошкент шаҳрининг Юнусобод туманида яшовчи фуқаро тўрт кун ичида кетма-кет икки нафар фарзандининг никоҳ тўйини ўтказди. Ушбу тўй туфайли келин ва 12 нафар маросим иштирокчиси коронавирусга чалинади. Айни пайтда кўплаб одамлар ушбу инфекцияни юқтириб олганликда гумон қилиниб, таҳлил натижаларини кутмоқда. Бу ҳақда Соғлиқни сақлаш вазирлиги хабар бермоқда.
Ҳозирда бўлиб ўтган тадбирларда иштирок этган ва улар билан мулоқотда бўлган барча фуқаролар, ўнлаб оила аъзоларидан COVID-19 га таҳлил олиниб, стационар ва уй карантинида тиббий кузатувга олинди. Эпидемиологик суриштирув ишлари давом этмоқда.
Тўй куни кеча бўлгани айтилган, аммо аниқ санаси келтирилмаган. ССВ 19 июнь куни Тошкент шаҳрида аҳоли орасида коронавирус юқтириб олиш ҳолатлари ҳақидаги хабарида Юнусободда бир оиланинг олти аъзоси касалликни юқтириб олгани, уларнинг ҳарорати кўтарилгач, тумандаги 52-оилавий поликлиникага мурожаат этганини маълум қилганди.
Аввалроқ Тошкентда ўтказилган туғилган кунда иштирок этган 13 киши коронавирус юқтириб олгани маълум бўлганди. Шунингдек, Самарқандда аза маросими чоғида коронавирус юқтириб олиш ҳолати қайд этилган.
«Кўриб турганингиздек, эҳтиёт чоралари кўрилмас экан, баъзи ҳолатларда туғилган кун, тўй ва бошқа шу каби тадбирлар фуқароларнинг оммавий касалликни юқтириб олишига сабаб бўлмоқда. Бу барчамиздан зарурат бўлмаганда оммавий ва оилавий тадбирлар ўтказишдан ҳамда унда иштирок этишдан вақтинчалик тийилиб туришимиз кераклигини кўрсатмоқда. Бу эса ўзимиз ва яқинларимизнинг саломатлиги учун бебаҳо қоида эканлигини унутмаслигимиз керак», — деб огоҳлантиради ССВ.
Ўзбекистонда ҳозиргача 6119 кишида коронавирус аниқланган, улардан 4390 нафари соғайган бўлса, 19 нафари касаллик асоратларидан вафот этган.
Изоҳ (0)