«Ювентус» ярим ҳимоячиси Сами Хедира жароҳат сабаб олти ҳафта мобайнида майдонга туша олмайди, дея хабар қилмоқда Sky Sport Italia.
Туринликлар клуби аввалроқ 33 ёшли футболчи сон мушакларидан жароҳат олгани ҳақида маълум қилганди. Шунингдек, жамоа ҳимоячиси Алекс Сандро ҳам жароҳат олган. Футболчининг 3 ҳафтага сафдан чиққани тахмин қилинмоқда.
Аввалроқ «Ювентус» футболчилари Жоржио Кьеллини, Гонсало Игуаин ва Аарон Рэмзи жароҳат олгани хабар қилинганди.
Жорий мавсум Хедира «Ювентус» сафида барча мусобақаларда 18 ўйин ўтказиб, битта голли узатма муаллифига айланди. Унинг жамоа билан амалдаги шартномаси 2021 йилнинг ёзига қадар мўлжалланган ва уни бир йилга узайтириш мумкинлиги ҳақидаги банд мавжуд.
Сандро эса 2019/20 йилги мавсумда 33 ўйинда иштирок этди ва тўртта ассистни ўз ҳисобига ёздириб қўйган. 29 ёшли бразилияликнинг «Ювентус» билан келишуви 2023 йил ёзигача амал қилади.
«Ювентус» А Серия 26-туридан сўнг 63 очко тўплаган ҳолда биринчи ўринда бормоқда. Иккинчи ўриндаги «Лацио» ундан 1 очко кам тўплаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)