19 июнь, жума куни футбол бўйича Ўзбекистон Суперлигасининг 5-тур ўйинларига старт берилади. Турнинг марказий учрашуви Тошкентда бўлиб ўтади. Унда пойтахтнинг икки клуби — «Пахтакор» ва «Бунёдкор» ўзаро куч синашади.
«Пахтакор»—«Бунёдкор»
Учрашув олдидан жамоаларнинг кайфиятлари турлича, «Бунёдкор» ўтган турда «Қўқон-1912»ни қабул қилиб, кичик 1:0 ҳисобида ғалаба қозонган бўлса, мусобақанинг амалдаги ғолиби «Пахтакор» кутилмаганда Жиззахда «Сўғдиёна»га имкониятни бой бериб қўйди (1:0).«Пахтакор» бунгача дастлабки уч турда ғалабага эришган. Шота Арвеладзе шогирдлари «Навбаҳор» (2:1), «Бухоро» (3:0) ва «Металлург» (4:1) клубларини мағлубиятга учратди. «Бунёдкор» эса жорий йилги чемпионатнинг дастлабки икки турида «Сурхон» ва (3:1), «Машъал»ни (1:0) мағлуб этди. 3-турда эса ОКМКдан 0:2 ҳисобида мағлубиятга учради.
Қайд этиш жоиз, Тошкентнинг мазкур жамоалари кўп йиллардан буён бир-бирига принципиал рақиб ҳисобланади. Учрашувнинг муҳим жиҳатларидан яна бири — бу жамоаларнинг турнир жадвалида ёнма-ён жойлашганидир. Ҳар иккала клуб ҳам бир хил: 9 очкодан жамғарган ҳолда, 2 ва 3-ўринларни бўлишиб турибди. «Шерлар»да тўплар нисбати 9-3 бўлса, «қалдирғочлар»да эса бу кўрсаткич 5-3 ни ташкил қилади.
Жамоаларнинг ўтган мавсумдаги икки ўйиннинг бирида Вадим Абрамов шогирдлари ғалаба қозонган, бошқасида эса «Пахтакор»нинг қўли баланд келган.
Ўзаро ўйинлар статистикаси
«Қўқон-1912»—«Қизилқум»
19 июнь кунидан ўрин олган яна бир учрашув Фарғона водийсида ўтказилади. Унда «Қўқон-1912» Навоийнинг «Қизилқум» жамоасини қабул қилади.Ҳар иккала жамоа вакиллари ҳам ўтган турда мағлубият аламини татиб кўрди. Мезбонлар Тошкентда «Бунёдкор» томонидан таслим этилган бўлса, «Қизилқум» ўз майдонида ОКМКга имкониятни бой бериб қўйди. Бахтиёр Ашурматов қўл остидаги жамоа 6 очко тўплаган ҳолда, мусобақа жадвалининг 6-поғонасидан ўрин эгаллаган. «Қизилқум» эса бир очкоси билан 13-ўринда бормоқда.
«Қўқон-1912» бунгача ўтказилган беллашувларнинг иккитасида ғалабага эришган. Қўқонликлар биринчи турда «Бухоро»ни 3:0, иккинчи турда «Сўғдиёна»ни 2:1 ҳисобида мағлуб этган. Меҳмонда кечган «Металлург»га қарши баҳсда эса 1:0 ҳисобида мағлубиятга учраган.
«Қизилқум» эса дастлабки турларда «Насаф», «Сурхон», ОКМК жамоаларидан мағлубиятга учраган ва фақат «Машъал»га қарши баҳсдагина дуранг қайд этган.
Жамоаларнинг ўтган мавсумдаги ўзаро ўйинларида томонлар бир мартадан ғалаба қозонган.
Ўзаро ўйинлар статистикаси
Ҳар иккала беллашув ҳам жонли эфирга узатилади.
Суперлига
5-тур баҳслари
19 июнь, жума
19:00. «Қўқон-1912» – «Қизилқум» | «Спорт ТВ»
20:00. «Пахтакор» – «Бунёдкор» | «Маҳалла»
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)