Япониянинг Ogiri Printing компанияси қориннинг ғулдураши сабаб ноқулай вазиятда қолмасликни истовчилар учун блокнот яратди. Блокнот жамланмасидан еса бўладиган қаҳвали сиёҳга эга ручка ҳам ўрин олган, деб хабар беради Sora News 24.
Блокнотдан қориннинг ғулдурашини яшириш ёки уни истеъмол қилиш орқали икки хил усулда фойдаланиш мумкин.
Агарда сиз қорнингиз ғулдурашини сезсангиз ва уни атрофдагилар эшитишини хоҳламасангиз, керакли вақтда блокнотни кескин очиш керак. Гап шундаки, блокнот муқоваси махсус лента билан қотирилган бўлиб, уни очганда 97 децибелли баланд овоз чиқади. Таққослаш учун ишлаётган газонокосилканинг овози 90 децибелга тенг.
Ихтирочиларнинг таъкидлашича, бу каби кескин овоз қориндан чиқадиган ёқимсиз товушдан атрофдагиларни чалғитади.
Ишончли чиқиши учун блокнотнинг бир-икки варағини ейиш ҳам мумкин — у истеъмолга яроқли. Блокнот қоғози нейтрал таъмга эга. Шу сабабли жамланмадаги махсус ручкани ҳам олиш ва ейишдан олдин вараққа бирор нима ёзиш тавсия этилади. Ручанинг ичидаги сиёҳ қаҳва таъмига эга бўлиб, у ҳам истеъмолга яроқли ҳисобланади.
Изоҳ (0)