«Яндекс» Москва жануби-ғарбидаги янги штаб-квартирасининг лойиҳасини намойиш этди. Бино «Корстон» меҳмонхонаси ўрнида қурилади, деб хабар беради «РБК».
Маълум қилинишича, бинонинг 1 ва 2-қаватлари қаҳвахона, дорихона ва гўзаллик салонларига берилади. Офис ҳудудида дам олиш, овқатланиш ва спорт билан шуғулланиш учун алоҳида ҳудуд бўлади. Штаб-квартира яқинида, академик Зелинский ва академик Зельдович кўчалари ўртасида боғ қад кўтаради.
«Яндекс» ходимлари учун эса ошхона, қаҳвахона, спорт заллари ва бассейн, шунингдек, бинонинг том қисмида майдонча қуриш кўзда тутилган.
«Янги штаб-квартира нафақат ходимлар учун уй ва маҳаллий аҳоли учун қулай маконга, балки тақдимот заллар, ўқув синфлари, компьютер техникалари музейига эга таълим майдончасига айланади», — дейилади компания хабарида.
«Яндекс» штаб-квартирасининг лойиҳаси Лондондаги PLP Architecture бюроси томонидан яратилган бўлиб, бош архитектор — Ли Полисано. Бинонинг ташқи кўринишини титан панеллар билан қоплаш режалаштирилган.
Шунингдек, лойиҳада Россияданинг АПЕКС ва РТДА бюролари ҳам иштирок этмоқда. Ландшафт дизайн билан «Зарядье» боғи ва «Лужники» спорт комплексини яратишда иштирок этган Arteza компанияси шуғулланади.
«Корстон» меҳмонхонаси биносини бузиш 2020 йил охирида бошланади. Ҳозирда «Яндекс»нинг штаб-квартираси пойтахтнинг Лев Толстой кўчасида жойлашган.
Изоҳ (0)