Telegram асосчиси Павел Дуров App Store ва Google Play орқали ўрнатилган мобил иловаларни сотиб олиш учун 30 фоизлик устама ҳақ олиниши сабабли Apple ва Google’ни танқид қилди. Бу ҳақда у ўзининг Twitter’даги саҳифасида ёзиб қолдирди.
«Apple ва Google дунёдаги ҳар бир мобил телефонда сотиладиган барча рақамли маҳсулотлар учун 30 фоиз солиқ ундиради. Натижада фойдаланувчилар юқори нархларда пул тўлайди, стартаплар ва бутун саноат емрилади ёки ҳеч қачон пайдо бўлмайди. Регулятор бундай ҳолатга 10 йилдан бери кўз юмиб келмоқда», — дейди у.
Павел Дуров муаммони ҳал қилиш учун иловаларни тўғридан-тўғри ёки бошқа илова дўконлари орқали ўрнатишни таклиф қилди.
Шунингдек, у бир неча йиллардан бери Android телефонларидан фойдаланиб келишини, чунки ушбу операцион тизим учинчи томон дастурларини ўрнатишга имкон беришини, аммо энди Google бу жараённи мураккаблаштиришга ҳаракат қилаётганини таъкидлади.
«Ушбу компанияларнинг миллиардлаб одамлар эркинлигини чеклашига йўл қўймаслик керак», — дейди Дуров.
Изоҳ (0)