Тошкент вилояти ҳокими қурилишдаги коррупция ҳақида гапирди. Вилоятда қурилиш устидан назорат кучайтирилади

Тошкент вилояти ҳокими Рустам Холматовнинг айтишича, қурилиш компанияси қурилишни вақтида бажара олмаса, ойма-ой, кунма-кун ҳисобланган параметрлардан асоссиз равишда ортда қолса, ҳолат атрофлича ўрганиб чиқилади, асоссиз равишда шундай қилган бўлса, тузилган шартнома бекор қилинади. Тошкент вилояти ҳокими бу ҳақда вилоятдаги қурилиш ташкилотлари раҳбарлари билан учрашувда айтиб ўтди, деб ёзмоқда «Kun.uz».

Маълум қилинишича, танқидий-таҳлилий руҳда ўтган йиғилишда қурилиш соҳасида шу вақтгача йўл қўйилган камчиликлар таҳлил қилинган.

«Қизиқ факт. Турли дастурлар ва расмий топшириқлар бўйича қурилиши керак бўлган битта объектга вилоятда ўртача 24 та қурилиш ташкилоти тўғри келяпти. Бунинг сабаби нима? Яшириб нима қилдик, шундай даврлар бўлдики, қурилиш соҳасида коррупция авж олди, ажратилган маблағнинг энидан-бўйидан уриб қолиш эвазига сифатсиз қурилган биноларни кўрдик, кўряпмиз», — деди Рустам Холматов.

Қайд этилишича, мажлисда қурилиш ишларини соҳанинг ўз эгалари олиб бориши муҳимлиги таъкидланган.

«Собиқ ҳоким, прокурор, солиқ идорасининг раҳбарларидан бири бўлиб ишлаган одам кейинчалик қурилиш ташкилоти очган. Нега?! Ахир у қурувчи эмас-ку! Чунки қурилишда ‘откат’ бор, пул бор. Мен ўзим шундайларнинг бири билан суҳбатлашдим. ‘Нима қура оласан?’, деб сўрасам, ‘Нима қур десангиз, қураман!’, дейди. Йўқ, бу қурувчининг гапи эмас. Объект олиб, уни ёлланма ишчиларга топшириб, ўртада пул ишлайдиган ўртакашнинг гапи бу», — дея таъкидлаган вилоят ҳокими.

Рустам Холматов Паркентда қуриб битказилган бўлса-да, айрим камчиликлари борлиги учун ҳали қабул қилиб олинмаган, бюджетдан ажратилган маблағлар тўла ўзлаштирилмаган мактабгача таълим ташкилотининг баҳордаги кучли шамол натижасида томи учиб кетганини ёдга олиб, эндиликда яна маблағ сарфлаб иншоотни қайта қураётган қурувчи учун бу катта сабоқ бўлиши зарурлигини таъкидлади.

Бундан ташқари, учрушувда Ангрен шаҳрида 2018 йили фойдаланишга топширилиши белгиланган мактабгача таълим ташкилоти ҳалигача фойдаланишга топширилмагани, сифатсиз қурилиш материалларидан фойдаланиш оқибатида бинонинг тақдири номаълум қолаётгани танқид қилинди. 2019 йилда шаҳар ва туманлар ҳокимларининг тавсияси асосида объектлар учун қурилиш корхоналари танланган бўлса, 2020 йил очиқ тендер йўли билан қурувчилар саралаб олинган.

«Қурилишда иккита асосий меъёр бор — сифат ва муддат. Бироқ айрим қурилиш ташкилотлари томонидан кўпинча объектни фойдаланишга режалаштирилган вақтидан кечиктириб топшириш ‘анъана’си бор. Энди бундай бўлмайди. Қайси ташкилот қурилишни вақтида бажара олмаса, ойма-ой, кунма-кун ҳисобланган параметрлардан асоссиз равишда ортда қолса, ҳолат атрофлича ўрганиб чиқилади, асоссиз равишда шундай қилган бўлса, тузилган шартнома, керак бўлса, бир томонлама бекор қилинади», — деб таъкидлаган вилоят раҳбари.

Қайд этилишича, охирги бир йилда вилоятда 20 дан ортиқ қурилиш ташкилотларига нисбатан жиноий иш очилган. Вилоят ҳокими бу масалага тўхталар экан, қурилиш жараёнидаги эътиборсизлик, лоқайдлик туфайли йўл қўйилган бу камчиликларнинг олдини вақтида олишга эътибор қаратган.

Рустам Холматов қурилиш ишлари бошлангандаёқ ҳар бир объект бўйича тегишли жамоатчилик вакили — халқ депутатлари вилоят Кенгаши депутати, молия бошқармаси, давлат молиявий назорат органининг вилоят бошқармаси вакиллари ишларнинг бориши, сифати календарь-режага, тегишли кўрсаткичларга мувофиқлиги устидан қатъий назорат ўрнатиши бўйича тизим ташкил этишга топшириқ берди.

Унга кўра, эндиликда Тошкент вилоятида амалга ошириладиган қурилиш ишларининг боришини тегишли назорат-тафтиш органларидан ташқари сектор раҳбарлари, депутатлар, молия органлари назорат қилиб бориши, иншоотнинг ўз вақтида ва юқори савияда фойдаланишга топширилиши юзасидан барчага нисбатан ҳисобдорлик жорий этилиши кўзда тутилмоқда.

«У ёки бу қурувчига содир этган қилмиши учун жиноий иш очилиши — чуқур қараганда, бўлар иш бўлгандан кейинги жараён. Жамият ва давлат учун ютуқ эмас, йўқотиш. Нега энди ҳали у ишни олиб бораётган, қурилиш жадал кетаётган пайтда давлат бюджети маблағларини ўзлаштиришига масъуллар жим қараб ўтиради? Айтайлик, исталган туман молия бўлими раҳбаридан ҳудудидаги қурилиш объектлари ҳақида сўрасангиз, билмайди. Ҳолбуки, у эмасми бюджетнинг назоратчиси?», — деди вилоят ҳокими.

Маълум қилинишича, учрашувда ҳафтанинг ҳар шанба куни қурилиш соҳаси ходимлари билан 2020 йилда қурилиши мўлжалланган объектларда ишларнинг боришини муҳокама этиш, бунда тегишли масъулларнинг ахборотини эшитишга келишилган.