Ўзбекистонда мавжуд 7,192 миллиондан ортиқ хонадоннинг 300 мингга яқини ёки 4,1 фоизи эҳтиёжманд хонадон ҳисобланади. Ушбу хонадонларнинг рўйхатлари маҳаллий Кенгашларнинг қарорлари билан тасдиқланган. Бу ҳақда 19 май, жума куни бўлиб ўтган Сенатининг бешинчи ялпи мажлисида маълум қилинди.
Сенат раиси Танзила Норбоеванинг таъкидлашича, пандемия сабабли мамлакат иқтисодий қийинчиликларни бошидан кечираётганлигига қарамасдан, аҳолини ижтимоий қўллаб-қувватлаш устувор йўналишлардан бири сифатида белгиланди. Кам таъминланган эҳтиёжманд аҳоли рўйхати шакллантирилиб, уларни камбағалликдан чиқариш бўйича амалий чоралар кўрилмоқда.
Қайд этилишича, тадбиркорлик билан шуғулланиш имкониятлари янада кенгайтирилмоқда. Амалдаги кўплаб талаб ва чекловлар қайта кўриб чиқилиб, соддалаштирилмоқда, катта имтиёзлар берилмоқда. Бунинг натижасида 500 мингдан зиёд тадбиркорлик субъекти ва 8 миллиондан ортиқ фуқарога қарийб 30 триллион сўмлик имтиёз ва преференциялар берилди.Эслатиб ўтамиз, 2020 йил якунига қадар Андижонда 40 724 та оилани, Фарғонада 43 мингта оилани камбағалликдан чиқариш, Ўзбекистонда саноат соҳасида 145 минг камбағал аҳолини ишга жойлаштириш режалаштирилган. 8 июнь куни қабул қилинган «Тадбиркорлик фаолияти ва ўзини ўзи банд қилишни давлат томонидан тартибга солишни соддалаштириш чора-тадбирлари тўғрисида»ги Президент қарорига мувофиқ, ўзини ўзи банд қилувчи фаолият турлари сони 24 тадан 67 тага кўпайтирилди.
Изоҳ (0)