Қозоғистонда коронавирусга чалинганлар сони 16 351 кишига, Қирғизистонда эса 2789 кишига етди

Қозоғистонда ўтган бир сутка ичида яна 474 кишида коронавирус аниқланди, деб хабар беради Tengrinews.

Мамлакат бўйлаб касаллар сонининг ортиши 3 фоизни ташкил этмоқда. Коронавирусга чалиниш бўйича янги ҳолатлар қуйидаги ҳудудларда аниқланган:

• Нур-Султон шаҳри — 103 (3,4 фоиз);
• Қарағанда вилояти — 57 (3,4 фоиз);
• Олмаота шаҳри — 41 (1,3 фоиз);
• Чимкент шаҳри — 37 (3,1 фоиз);
• Шарқий Қозоғистон вилояти — 35 (11,7 фоиз);
• Туркистон вилояти — 32 (6,6 фоиз);
• Жамбил вилояти — 29 (5,5 фоиз);
• Ғарбий Қозоғистон вилояти — 28 (2,7 фоиз);
• Ақтўбе вилояти — 27 (4,8 фоиз);
• Ақмўла вилояти — 20 (8,3 фоиз);
• Атирау вилояти — 17 (1,2 фоиз);
• Шимолий Қозоғистон вилояти — 12 (9 фоиз);
• Костанай вилояти — 11 (4,5 фоиз);
• Қизилўрда вилояти — 11 (2,1 фоиз);
• Олмаота вилояти — 9 (1,7 фоиз);
• Манғистов вилояти — 5 (1,2 фоиз).

Бутун мамлакат бўйлаб коронавирусга чалинганлар сони 16 351 кишига етган. Ҳозирга қадар 10 139 киши соғайган, 105 киши вирус қурбонига айланган. Шунингдек, 7609 киши коронавирусни белгисиз ташувчи сифатида қайд этилган.Қирғизистонда 19 июнь ҳолатига кўра, яна 132 кишида коронавирус инфекцияси аниқланди. Бу ҳақда мамлакат Соғлиқни сақлаш вазирлигига таяниб, Kloop хабар берди.

Коронавирусга чалинган янги касалларнинг 48 нафари Бишкек шаҳри ҳисобига тўғри келмоқда. Шунингдек, қуйидаги ҳудудларда ҳам коронавирус билан касалланиш бўйича янги ҳолатлар қайд этилган:

• Чуй вилояти — 38;
• Ўш шаҳри — 13;
• Ўш вилояти — 12;
• Талас вилояти — 4;
• Норин вилояти — 6;
• Жалолобод вилояти — 11.

Касалланиш бўйича янги қайд этилган ҳолатлар орасида 8 нафар тиббиёт ходими ҳам бор.

Бутун мамлакат бўйлаб COVID-19 билан касалланганлар сони 2789 кишига етди, уларнинг 32 нафари вирус қурбонига айланган. Ҳозирга қадар 1961 нафар бемор даволанишга муваффақ бўлган.

Афғонистонда ўтган бир сутка ичида яна 658 кишида коронавирус аниқланди, деб хабар беради Tolo News.

Мамлакат Соғлиқни сақлаш вазирлигининг маълумотларига кўра, Афғонистонда коронавирусга чалинганлар сони 27 532 кишини ташкил этмоқда.

Ўтган бир сутка давомида пойтахт Кобул шаҳрининг ўзида 415 кишида коронавирус аниқланган.

Бутун мамлакат бўйлаб коронавирус оқибатида вафот этганларнинг жами сони 546 кишига етди, ҳозирга қадар 7660 бемор даволанишга муваффақ бўлди. Ўтган бир сутканинг ўзида 1502 киши соғайган, ҳозирга қадар Афғонистонда коронавирусга қарши 61,6 мингдан ортиқ тест ўтказилган.

Тожикистонда коронавирус билан касалланганлар сони 5279 кишига етди, деб хабар беради «РИА Новости». Ўтган сутка давомида яна 68 кишида коронавирус аниқланган.

Мамлакатда ўтган бир сутка ичида 62 кишига шифохонадан жавоб берилган бўлиб, ҳозирда Тожикистондаги тиббиёт муассасаларида 248 киши даволанмоқда.

Мамлакатда ҳозирга қадар 51 киши COVID-19 қурбонига айланган, 3762 бемор даволанишга муваффақ бўлган.

Ўзбекистонда 19 июнь соат 10:00 ҳолатига кўра, коронавирусга чалинганларнинг умумий сони 5855 нафарга етди. Мамлакатда инфекциядан соғайганлар сони 4199 нафарни (71 фоиз) ташкил этмоқда. COVID-19 коронавируси Ўзбекистон ҳудудига кириб келганидан буён жами 19 нафар бемор мазкур инфекция асоратлари оқибатида ҳаётдан кўз юмган.