АҚШ президенти Дональд Трамп Хитой президенти Си Цзиньпиндан қайта сайланишида унга ёрдам беришини «ўтиниб сўраган». Бу ҳақда Трампнинг миллий хавфсизлик бўйича собиқ ёрдамчиси Жон Болтон ўзининг Оқ уйдаги фаолияти ҳақидаги китобида маълум қилган. Китоб ҳали чоп этилмаган бўлиб, ундан парчаларни The Washington Post газетаси эълон қилган.
Болтоннинг сўзларига кўра, 2019 йилнинг июнида Япониянинг Осака шаҳрида бўлиб ўтган саммитдаги икки томонлама учрашувда Си Цзиньпин Трампга АҚШда Хитойни танқид қилишларидан шикоят қилди. «У (Си Цзиньпин) исмларини ошкор қилмаган ҳолда америкалик айрим сиёсатчилар Хитойга совуқ уруш чиқаришга туртки бериб, нотўғри хулоса қилаётганини айтди», — дейди Болтон.
Трамп эса, унинг сўзларига кўра, Си Цзиньпин демократларни назарда тутяпти, деб тахмин қилган. «Трамп демократлар орасида Хитойга нисбатан катта адоват борлигини таъкидлади», — деб ёзмоқда президентнинг собиқ маслаҳатчиси.
Шундан сўнг «Трамп Хитойнинг иқтисодий салоҳиятига шама қилган ҳолда яқинлашиб келаётган АҚШ президентлиги сайловларига гапни буриб, Си Цзиньпиндан унинг ғалабасини таъминлашга ёрдам беришини ўтиниб сўраган. У фермерларнинг ва Хитойнинг соя ва буғдой сотиб олиш ҳажмининг ошириши сайлов натижаларига таъсирида муҳим аҳамият касб этишини таъкидлаган», — дейди Болтон.
Жон Болтоннинг билдиришича, у Трампнинг гапларидан тўлиқ иқтибос келтириши мумкин, лекин унга бундай қилиш тақиқланган.
Amazon’нинг бесцеллерлар топ-100 талигида Болтоннинг китоби биринчи ўринда. Компания уни ҳозиргача фақат олдиндан буюртма қилиш асосида сотмоқда. Китоб тўлиқ кўринишда 23 июнь куни чоп этилиши режалаштирилмоқда.
Аввалроқ АҚШ Адлия вазирлиги Оқ уйдаги фаолияти ҳақида китоб нашр этмоқчи бўлган Трампнинг собиқ ёрдамчиси Жон Болтонни судга бергани ҳақида хабар қилинганди.
Изоҳ (0)