Ўзбекистонда 2020 йилнинг январь—май ойларида республикада автомобиль бензини ишлаб чиқариш ҳажми 2019 йилнинг шу даврига нисбатан кўпайди. Бу ҳақда Давлат статистика қўмитаси маълумотларида келтирилган.
Қайд этилишича, 2019 йилнинг шу даврида 389 минг тонна бензин ишлаб чиқарилган бўлса, 2020 йилда ушбу кўрсаткич 441,3 минг тоннани ташкил этди.
Шунингдек, дизель ёқилғисини ишлаб чиқариш ҳажмида ҳам ўсиш кузатилган. 2019 йилда 437,4 минг тонна дизель ишлаб чиқарилган бўлса, 2020 йилда 461,6 минг тоннага етди.
Шу билан бирга, Ўзбекистон 2020 йил январь—май ойларида нефть қазиб олишни 2019 йилнинг шу даврига нисбатан (290,4 минг тонна) бироз оширди — 296,3 минг тоннагача.
Январь—май ойларида табиий газ қазиб олиш 21,1 миллиард куб метрни ташкил этган, бу 2019 йилнинг шу даврига нисбатан кам (25,5 миллиард куб метр), демак. Газ конденсатини қазиб олишга ҳам шу ҳолат — 2019 йилда 875,9 минг тонна кўрсаткич қайд этилган бўлса, 2020 йилнинг январ—май ойларида 620 минг тоннага тушиб кетган.
Аввалроқ Бухоро нефтни қайта ишлаш заводида Аи-80 маркали бензин ишлаб чиқаришдан бутунлай воз кечиш режалаштирилаётгани тўғрисида хабар берилганди.
Эслатиб ўтамиз, апрель ойининг бошида «Ўзбекнефтгаз» АЖ бошқарув кенгаши раисининг ўринбосари Улуғбек Ашуров Ўзбекистонда бензин ва дизель нархи пасайишини маълум қилганди. 29 апрелдан бошлаб Аи-92 маркадаги бензин нархини 500 сўмга арзонлаб, 5500 сўм, 3 майдан бошлаб эса Аи-80 бензини ҳам 500 сўмга пасайиб, 4000 сўмдан сотиш йўлга қўйилди. 15 майдан бошлаб мамлакатдаги UNG ёқилғи қуйиш шохобчаларида импорт қилинган Аи-92 бензинининг нархи 5000 сўмга туширилган.
Изоҳ (0)