Ўзбекистон ташқи ишлар вазири ўринбосари лавозимида ишлаб келган Дилшод Аҳатов Ўзбекистоннинг Ҳиндистондаги фавқулодда ва муҳтор элчиси этиб тайинланди. Бу ҳақда Ташқи ишлар вазирлиги хабар берди.
Маълум қилинишича, Ўзбекистоннинг Ҳиндистондаги элчиси этиб тайинланган Дилшод Аҳатов 18 июнь куни Деҳли шаҳрига жўнаб кетди.
Мазкур тайинловга қадар Дилшод Аҳатов 2018 йилдан буён Ўзбекистон ташқи ишлар вазири ўринбосари лавозимида ишлаб келаётганди. Дилшод Аҳатов 2010—2013 йилларда Ўзбекистоннинг Германиядаги элчиси, шунингдек, ўриндошлик асосида Швейцария, Чехия, Швеция ва Испаниядаги элчи сифатида фаолият юритган.
Дилшод Аҳатов 1972 йилда Самарқанд вилоятида туғилган. У Жаҳон иқтисодиёти ва дипломатия университети ва Москва давлат халқаро муносабатлар институтини тамомлаган. Дилшод Аҳатов иш фаолиятини Ташқи ишлар вазирлигида бошлаган, у 2003—2007 йилларда Европа мамлакатлари билан ҳамкорлик бошқармасининг бўлим бошлиғи, 2007−2010 йилларда Европа мамлакатлари ва НАТО билан ҳамкорлик бошқармаси бошлиғи, БМТ ва халқаро ташкилотлар бошқармаси бошлиғи бўлган. Дилшод Аҳатов Ташқи ишлар вазирининг ўринбосари сифатида вазирликнинг Икки томонлама ҳамкорлик бош бошқармасига раҳбарлик қилган.
Эслатиб ўтамиз, Ўзбекистоннинг Ҳиндистондаги собиқ элчиси Фарҳод Арзиев февраль ойида ташқи ишлар вазирининг биринчи ўринбосари этиб тайинланганди.
Аввалроқ Алишер Курманов Ўзбекистоннинг Украинадаги элчиси этиб тайинлангани ҳақида хабар берилганди.
Маълумот учун, жорий йилда Ўзбекистон Ташқи ишлар вазирлиги раҳбариятида бир қатор ўзгаришлар юз берди. Ўзбекистоннинг Ҳиндистондаги фавқулодда ва мухтор элчиси Фарҳод Арзиев 25 февралда ташқи ишлар вазири биринчи ўринбосари этиб тайинланди, собиқ биринчи ўринбосар лҳом Неъматов вазир ўринбосари лавозимига ўтди. 20 март куни Ўзбекистоннинг Австриядаги элчиси, Европада хавфсизлик ва ҳамкорлик ташкилоти ва Вена шаҳридаги бошқа халқаро ташкилотлар ҳузуридаги доимий вакили бўлиб ишлаган Шерзод Асадов ташқи ишлар вазирига ўринбосар бўлди. Миллатлараро муносабатлар ва хорижий мамлакатлар билан дўстлик алоқалари қўмита раисининг ўринбосари сифатида ишлаб келган Эркин Ҳамроев 23 апрель куни ташқи ишлар вазирининг ўринбосари лавозимига тайинланган. 30 май куни эса Ўзбекистоннинг Покистондаги фавқулодда ва мухтор элчиси лавозимида ишлаб келаётган Фурқат Сиддиқов ташқи ишлар вазирининг ўринбосари лавозимига тайинлангани ҳақида хабар берилди.
Изоҳ (0)