Хитой ва Ҳиндистон ўртасидаги чегаранинг баҳсли ҳудудида содир бўлган тўқнашув оқибатида 20 нафар ҳинд аскари ҳалок бўлган. Икки мамлакат ҳукумати бу тўқнашувда бир-бирини айбламоқда, бироқ Пекин ҳам, Деҳли ҳам низонинг авж олиб кетишини истамаслигини билдирмоқда. Бу ҳақда Meduza хабар берди.
Ҳарбийларнинг ўлимига сабаб бўлган ҳодиса Ҳималайнинг ғарбидаги Ладакхда юз берган. Ҳиндистон ва Хитой ўртасидаги мазкур ҳудудга етиб бориш қийин бўлган ва аҳоли яшамайдиган тоғли жойда, денгиз сатҳидан қарийб беш минг метр баландликда жойлашган.
Мазкур ҳудуддаги баҳсларнинг илдизи XIX асрга бориб тақалади, ҳозир эса мазкур баҳслар икки мамлакатнинг минтақадаги таъсир учун курашида бир қисмга айланган. Чегаранинг баъзи қисмлари ҳалигача демаркация қилинмаган. 1962 йилда 2000 кишининг ўлимига сабаб бўлган можародан кейин томонлар вақтинчалик чегара чизиғи ҳақида келишиб олган. Ўшандан буён мазкур чизиқ чегара сифатида қаралади, уни расман тасдиқлаш бўйича эса музокаралар олиб борилмоқда. Расман белгиланган чегара чизиғининг мавжуд эмаслиги сабабли вақти-вақти билан чегарачилар ва ҳарбийлар ўртасида тўқнашувлар юз беради, бироқ бир неча ўн йилдан буён бу тўқнашувлар ўлимга сабаб бўлмаганди.
Ҳозирги низо май ойининг биринчи ярмида бошланган — бир ой давомида бир неча марта муштлашув кўринишидаги жанжаллар юз берган, уларда 100 нафардан ортиқ ҳарбий хизматчи жароҳат олган. Можаро Ҳиндистон томонда чегараолди инфратузилмасини яхшилаш бўйича яқинда бошланган ишлар сабабли юзага келди. Хитой бу ишларга қарши чиқди: агар жиддий можаро юз берадиган бўлса, мазкур инфратузилма Ҳиндистонга тезкорлик билан чегарага ҳарбийлар отряди ва қуролларни етказиш имконини беради.
Аскарларнинг ўлими билан якунланган тўқнашув 16 июнга ўтар кечаси юз берди. Тош ва таёқ ишлатилган қўл жангида юз нафардан ортиқ аскар иштирок этган, ўқотар қурол ишлатилмаган. Натижада 20 нафар ҳинд аскари, шу жумладан, уч нафари тўқнашув вақтида, 17 нафари эса олинган жароҳатлар ва совуқ уриши оқибатида кейинроқ ҳалок бўлган. Ҳинд ОАВлари 43 нафар хитойликнинг ҳалок бўлгани ҳақида хабар берган, Хитой томони эса йўқотишлар бўлганини тасдиқлаган, бироқ ҳалок бўлганлар ёки жароҳатланганлар сонини маълум қилмаган.
Ҳиндистон юз берган воқеа учун жавобгарликни Хитойга юклаган ва уни шу пайтгача мавжуд бўлган ҳолатни бир томонлама бузишда айблаган. Ўз навбатида, Пекин можаро ҳинд аскарларининг чегара чизиғини кесиб ўтгани сабабли юзага келганини маълум қилган.
Шу билан бирга, томонлар низонинг давом этишини истамаслигини яна бир бор таъкидлаб ўтган. Хитой Ташқи ишлар вазирлигининг маълум қилишича, чегарадаги вазият барқарор ва уни назорат қилиш мумкин. Ҳиндистон бош вазири Нарендра Моди эса Хитой билан тушунмовчилик можарога олиб келмаслигига умид билдирган. Чегара ҳудудидаги ҳарбий қўмондонлик вакиллари музокараларнинг янги босқичини бошлаган.
Изоҳ (0)