КХДР Кореялараро келишувларга биноан қўшинлар олиб чиқиб кетилган ҳудудларга ўз ҳарбий бўлинмаларини қайтармоқчи эканлигини билдирди. Бу ҳақда Шимолий Корея халқ армияси бош штаби баёнотида қайд этилган бўлиб, ҳужжат матни Шимолий Корея Марказий телеграф агентлиги томонидан 16 июнь куни эълон қилинган.
Бу чегарани қалъага айлантириш ва жанубга қарши ҳарбий ҳушёрликни кучайтириш мақсадида амалга оширилади.
«Бизнинг армиямиз жануб ва шимол ўртасидаги муносабатлар тобора ёмонлашаётгани доирасида юз бераётган вазиятни диққат билан кузатиб бормоқда ва партия ҳамда ҳукумат томонидан кўрилаётган ҳар қандай чораларни ҳарбий жиҳатдан қўллаб-қувватлашга тайёр», — дейилади бош штаб баёнотида.
Шунингдек, қайд этилишича, Партия марказий ҳарбий комиссиясининг розилигини олиш ниятида ҳарбий раҳбарият белгиланган мақсадларни зудлик билан амалга ошириш учун ҳаракатлар режасини ишлаб чиқади.
Шимолий ва Жанубий Корея муносабатлари сўнгги икки ҳафта давомида ёмонлашиб бормоқда. Дастлаб КХДР Жанубий Кореянинг қўнғироқларига жавоб бермаган. 9 июнь куни эса КХДР 2018 йилдан бери илк бор Жанубий Корея билан алоқаларни тўхтатди. КХДР Сеул билан барча алоқа линияларини Пхеньянга қарши юборилган ташвиқот варақалари сабаб блоклаган. Узоқ йиллар давомида ишламаган алоқа линиялари 2018 йилда қайта тикланган, шундан буён мамлакатлар кунига икки маротаба ўзаро қўнғироқлашиб турганди.
14 июнь куни Жанубий Корея ҳукумати Шимолий Корея билан боғлиқ ҳар қандай вазият юзасидан жавоб беришга тайёрлигини таъкидлаб, КХДРни икки мамлакат ўртасидаги ҳарбий битим бўйича келишувларини амалга оширишга чақирди.
16 июнь куни эса Шимолий Корея ҳарбийлари Кэсон шаҳрида жойлашган Кореялараро алоқа офисини портлатиб юборди.
Изоҳ (0)