Хитойда сўнгги суткада коронавирус билан касалланиш бўйича 40 та ва касаллик белгисиз ўтаётган 6 та ҳолат аниқланди. Беморларнинг 7 нафари соғайди, вафот этиш ҳолатлари қайд этилмади, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Қайд этилишича, аниқланган ҳолатларнинг 32 таси мамлакатнинг ўзида, 8 таси четдан юқтирилган.
Бир кун аввал коронавирус билан касалланиш бўйича 49 та ва касаллик белгисиз ўтаётган 18 та ҳолат аниқланганди. Касалланиш ҳолатларининг аксарияти Пекиннинг Фэнтай ҳудудидаги «Синьфади» энг йирик улгуржи бозори билан боғлиқ бўлиб, айни пайтда бозор ёпилган. Бунга эпидемиологик суриштирувдан кейин импорт қилинган лосос балиғи тахтасида коронавирус аниқлангани сабаб бўлган.
Айни вақтда Фэнтай ҳудудида, қўшни Хэбэй провинциясининг Баодин шаҳрида ҳам ҳарбий ҳолат режими жорий қилинган. Пекиннинг тўртта ҳудудида эпидемиологик хавф даражаси «қуйи»дан «ўрта»га кўтарилган.
Мамлакатда умумий ҳисобда 83 221 киши коронавирусга чалинган. Беморларнинг 78 377 нафари соғайган, 4 634 нафари вафот этган. Касалхоналарда 210 нафар бемор қолмоқда.
Шунингдек, сутка давомида 6 киши инфекцияни белгисиз ташувчи сифатида қайд этилган. Шундай кишиларнинг яна 110 нафари шифокорлар назоратида бўлиб турибди.
Жанубий Кореяда эса сутка давомида 34 киши коронавирусга чалингани қайд этилиб, касалланганларнинг умумий сони 12 155 нафарга етди, деб хабар бермоқда «РИА Новости» .Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига кўра, касалланганларнинг 21 нафари вирусни мамлакатнинг ўзида, 13 нафари четдан юқтирган.
Сўнгги суткада 30 киши коронавирусдан соғайиб, тузалганларнинг умумий сони 10 760 нафарга етди. Касаллик қурбонлар сони бир кишига кўпайиб, 278 нафарни ташкил қилмоқда.
Мамлакатда коронавирусни аниқлаш бўйича 1,12 миллионта тест ўтказилган.
Изоҳ (0)