Дональд Трампнинг жияни президент ҳақидаги «ахлоқсиз ҳикоялар»ни ошкор қилишни режалаштирмоқда

АҚШ президенти Дональд Трампнинг марҳум акаси Фред Трампнинг қизи Мэри Трамп 2020 йилнинг ёзида Дональд Трамп ҳақидаги «юракни эзадиган ва ахлоқсиз» ҳикояларни ўз ичига олган китоб чиқаришни режалаштирмоқда. Бу ҳақда The Daily Beast нашрига таяниб, «РБК» хабар берди.

Маълум қилинишича, 55 ёшли Мэри Трамп 11 август куни «Too Much And Never Enough» («Жуда кўп ва ҳеч қачон етарли эмас») номли китобни нашр эттиришни режалаштирмоқда. Китобнинг мазмуни сир тутилмоқда, бироқ китобнинг асосий «кашфиётлари»дан бири президентнинг жияни New York Times’да Дональд Трампнинг солиқ схемалари ҳақида материал эълон қилинишида қандай роль ўйнагани ҳақидаги ҳикоя бўлиши кутилмоқда.

New York Times томонидан олиб борилган ўрганишда Трамп ўз отаси Фред Трампнинг бизнесидан 400 миллион доллардан ортиқ маблағни чиқариб олишда фирибгарликка асосланган солиқ схемаларидан фойдалангани ҳақида гап боради.

The Daily Beast’нинг ёзишича, айнан Мэри Трамп New York Times’га нашр учун асос бўлган махфий маълумотларни, солиқ декларацияларини ва бошқа молиявий ҳужжатларни тақдим этган.

Шунингдек, китобда Мэри Трампнинг отаси — президентнинг катта акаси, кичик Фред Трампнинг ўлими тафсилотлари очиб берилади. У 1981 йилда алкоголизмдан вафот этган. Муаллиф Дональд Трамп ва унинг отаси кичик Фред Трампнинг касаллигини билмасликка олиб, унинг ўлимига сабаб бўлганини айтиб беради.

Аввалроқ The Washington Post газетаси америкалик журналист Мэри Жорданнинг «Унинг шартнома санъати: Мелания Трампнинг айтилмаган ҳикоялари» номли китобидан парчани нашр қилган. Парчада айтилишича, АҚШнинг 45-президенти рафиқаси эри сайланганидан кейин Оқ уйга дарҳол кўчиб ўтишни истамаган, бунда Мелания Трамп уларнинг ўғли Бэрроннинг Нью-Йоркдаги ўқиши тугашини кутишни хоҳлаган.

Хабар берилишича, Мелания Трамп бу вазиятдан никоҳ шартномасини ўзгартириш учун фойдаланган. Шартноманинг янги таҳририга Бэррон Трамп учун отасининг оилавий бизнесида иштирок этиш кафолати қўшилган.

Аввалроқ Трамп АҚШ президентлиги сайловларида ютқазса, нима билан шуғулланишини маълум қилганди.