2020 йил 14 июнь куни Туркиянинг шарқий ҳудудида 5,7 балли ер силкиниши кузатилди. Табиий офат оқибатида вафот этган ва бедарак йўқолганлар ичида Ўзбекистон фуқаролари йўқ. Бу ҳақда Ўзбекистоннинг Анқарадаги элчихонаси маълумотига асосланиб Ташқи ишлар вазирлигининг «Дунё» ахборот агентлиги хабар қилди.
Мамлакат фавқулодда вазиятлар вазирлиги зилзила 14 июнь маҳаллий вақт билан соат 17:24 да содир бўлгани, кучли ер қимирлашидан кейин Туркия шарқидаги Бингел вилоятида 18 киши бедарак йўқолгани, кейинчалик улардан бир нафари вафот этгани аниқланганини хабар қилган.
Ҳудудга 100 нафар шифокор ва қутқарувчи юборилган. Шунингдек, 550 та вақтинча яшаш учун чодир етказилган.
Маълумотларга кўра 5,7 балли ер силкиниши маркази сифатида Карлёва ҳудуди қайд этилган. Зилзила Элзурум, Трабзон, Карс, Ватман, Сиирт, Мардин, Элазиг ва Малатяда ҳам сезилган.
Туркия оммавий ахборот воситалари маълумотига кўра, йил бошидан буён Туркияда бир неча бор кучли ер қимирлаши кузатилган. 2020 йил январь ва февраль ойларида содир бўлган зилзила оқибатида 44 киши вафот этганди.
Изоҳ (0)