Samsung компанияси Galaxy S20+ 5G флагмани ҳамда Galaxy Buds+ симсиз наушнигининг ўзига хос версиясини тақдим этди. Улар таниқли BTS k-pop гуруҳи услубида яратилган.
«Мазкур янгилик мухлисларга ўзининг севимли гуруҳи билан янада яқин алоқада бўлиш имкониятини тақдим этади», — дейилади хабарда.
Гаджетлар корпусининг ранги билан стандарт версиялардан фарқ қилади: смартфоннинг орқа томони, наушниклар учун ташқи кейс ва Galaxy Buds+ сенсор майдончаси бинафша рангга бўялган. Шунингдек, қурилма корпусларига BTS логотиплари чизилган. Етказиб бериш жамланмаси ҳам фарқ қилади — Galaxy Buds+ қутисига гуруҳнинг расми туширилган. Galaxy S20+ 5G BTS Edition дастурий таъминот мавзуси ҳам BTS’нинг ўзига хос услубида яратилган.
АҚШ аҳолиси Galaxy S20+ 5G BTS Edition ва Galaxy Buds+ BTS Edition моделларини 19 июндан 8 июлга қадар Samsung’нинг расмий сайти орқали буюртма қилишлари мумкин. Смартфонни харид қилганларга наушниклар 50 фоиз чегирма билан тақдим этилади.
Эслатиб ўтамиз, Samsung компанияси Galaxy S20, S20+ ва S20 Ultra моделларини 2020 йилнинг февралида оммага тақдим этганди.
Изоҳ (0)