Xiaomi Mi Band 5 фитнес-билагузугини тақдим этди. У бир марта қувватлантириш билан 1 ой ишлайди

Xiaomi компанияси кўплаб жиҳатлари билан Mi Band 4’дан яхшироқ бўлган янги авлод фитнес-билагузугини тақдим этди, деб хабар беради «Hi-Tech.Mail.ru».

Умуман олганда, Mi Band 5’нинг ташқи кўриниши жиддий ўзгармаган — билагузук капсула шаклида бўлиб, махсус тасма ёрдамида қўлга тақилади. У ўз эгасининг қадамини санаши, пульсини кузатиши, машғулотлар натижасини қайд этиб бориши ва бошқа кўплаб вазифаларни бажариши мумкин.

Янги билагузукнинг OLED-дисплейи ҳошиялар ҳисобига 0,95 дан 1,2 дюймга қадар катталашган. Шунингдек, Xiaomi дастлабки қувватловчи мослама ўрнига магнит коннектордан фойдаланган бўлиб, у контакт майдонгача қотирилади — бу билагузукни тасмадан ечмасдан туриб қувватлантириш имконини беради.

Таъкидланишича, Mi Band 5 бир марта қувватланиш орқали 3-4 ҳафта ишлай олади.

Мониторинг тизимида ҳам янги функциялар пайдо бўлган. Билагузук атмосфера босимини ва қондаги кислород даражасини кузатади. Шунингдек, Mi Band 5 уй борасида анча аниқ ва тўлиқ статистика бера олади. Спорт ва жисмоний фаоллик турлари рўйхати 11 та позицияга қадар кўпайтирилган.

Mi Band 5 интерфейс ва циферблатлар дизайни борасида 100 та стандарт вариантга эга бўлган. Шунингдек, билагузук тасмаларининг ранги ҳам кўпайган.

Яна бир кичик функция — смартфон камерасини бошқариш. Билагузук ёрдамида масофадан туриб суратга олиш мумкин. Янги Mi Band 5’нинг нархи 189 юанни (26,6 доллар) ташкил этади.

Аввалроқ Xiaomi Mi Band 5 Google Pay билан ҳамкорликдаги NFC модулига эга бўлиши мумкинлиги ҳақида хабар берилганди.