Қорақалпоғистон Республикаси Нукус шаҳрида 12 июнь куни 63 ёшли эркак туғилган кунини нишонлаб, спиртли ичимлик таъсирида каналда чўмилиш вақтида оқиб кетган ва ҳудуд профилактика инспектори томонидан қутқариб қолинган. Бу ҳақда Қорақалпоғистон Республикаси ИИВ ахборот хизмати хабар берди.
Маълум қилинишича, 12 июнь куни 63 ёшни қаршилаган нукуслик фуқаро С.Б. туғилган куни баҳонасида икки қўшниси билан яшаш жойига яқин жойдан оқиб ўтувчи «Қатти ағар» каналига чўмилиш учун борган. Спиртли ичимлик таъсирида чўмилишга тушган улфатлар бироздан сўнг таваллуд куни соҳибининг ғойиб бўлиб қолганини пайқаган.
Воқеа бўйича дастлаб ички ишлар, сўнгра фавқулодда вазиятлар бошқармаси, прокуратурага хабар берилиб, қидирув ишлари бошлаб юборилган.
Қидирув ишларида иштирок этаётган ҳудуд профилактика инспектори, катта лейтенант Рафат Хожаниязов ғоввослар фуқарони сув тубидан излаётган бир пайтда ён атрофни кўздан кечиришни бошлаган. Воқеа жойидан 3 километр йўл юрган профилактика инспектори канал бўйидаги дарахт шохларига тирмашиб, сувдан чиқишга ҳаракат қилаётган фуқарони кўриб, унинг сувдан чиқишига ёрдам берган. Бу фуқаро чўкиб кетгани тахмин қилинган С.Б. бўлиб чиқди.
Изоҳ (0)