Андижон вилояти Марҳамат туманида бир неча фуқарога тадбиркорлик учун ер ажратиб бериш эвазига 8250 доллар, бир кишига икки хонали уй олиб бериш учун 27 миллион сўм олган масъул шахс фош этилди. Бу ҳақда «Дарё»га Бош прокуратура томонидан маълум қилинди.
Хабар берилишича, мазкур ҳолат Бош прокуратура ҳузуридаги Иқтисодий жиноятларга қарши кураш департаментининг Марҳамат туман бўлими томонидан ДХХ ходимлари билан ҳамкорликда ўтказилган тезкор тадбирда аниқланган.
Маълум бўлишича, Андижон вилояти кичик саноат зоналарини бошқариш ягона дирекцияси Марҳамат тумани етакчи мутахассиси Д.А. фирибгарлик йўли билан даромад орттириш мақсадида фуқаро Б.М.нинг ишончига кириб, унга туман ҳудудидаги кичик саноат зонаси учун ажратилган ер майдонидан уй-жой қуриш ҳамда тадбиркорлик фаолияти билан шуғулланиши учун 10 сотих ер майдони ажратиб беришни айтган ва бунинг эвазига 1500 доллар талаб қилган. Масъул ходим мазкур пулларни олган вақтида ашёвий далил билан ушланган.
Шунингдек, ушбу ҳолат бўйича ўтказилган терговга қадар текширувда етакчи мутахассис Д.А. 2020 йилнинг май ойида тўрт нафар фуқаронинг ишончига кириб, тадбиркорлик фаолиятини бошлашга ер ажаратиш учун 6750 долларни ҳамда бир кишига туманда қурилаётган кўп қаватли уйдан 2 хонали уй олиб бериш эвазига 27 миллион сўмни қўлга киритганлиги аниқланган.
Мазкур ҳолатлар юзасидан Д.А.га нисбатан Жиноят кодексининг 168-моддаси билан жиноят ишлари қўзғатилиб, тергов ҳаракатлари ўтказилмоқда.
Мавзуга доир:
- Фарғонада қурилиш объектини олиб бериши эвазига 5 минг доллар сўраган қишлоқ хўжалиги ҳисобчиси фирибгарлик устида ушланди
- Тошкент давлат аграр университети Андижон филиалига 2 минг долларга ўқишга киритиб қўймоқчи бўлган собиқ ўқитувчи ушланди
- Наманганда университетга ўқишга киритишни ваъда қилиб, 2,5 минг доллар ва 5 млн сўм талаб қилган фирибгар ўқитувчи қўлга тушди
Изоҳ (0)