Сурхондарё вилояти агроинспекция Шўрчи тумани бўлими инспектори трактор ва унинг тиркамасига янги намунадаги давлат рақами ва техник гувоҳнома тайёрлаб беришни ваъда қилиб фирибгарлик йўли билан пул ишлаб олмоқчи бўлгани аниқланди. Бу ҳақда Бош прокуратура ахборот хизмати «Дарё»га маълум қилган.

Бош прокуратура ҳузуридаги департаментнинг Бандихон туман бўлими ДХХ ходимлари билан ҳамкорликда ўтказилган тезкор тадбирда, агроинспекциянинг Шўрчи тумани бўлими инспектори Ф.М. ҳибсга олинган.

Ф.М фуқаро Ф.Х.га тегишли бўлган, ҳужжатсиз Т-40 русумли трактори ва тиркамасига янги намунадаги давлат рақами, техникани рўйхатга олиш гувоҳномаси тайёрлаб бериш эвазига 1 миллион 800 минг сўм талаб қилган. «Ўзагроинспекция» ходими пулларни фирибгарлик йўли билан олган вақтида ашёвий далил билан ушланган.

Мазкур ҳолат юзасидан Ф.М.га нисбатан Жиноят кодексининг 168-моддаси 3-қисми (Фирибгарлик) билан жиноят иши қўзғатилиб, тергов ҳаракатлари ўтказилмоқда.

Аввал Андижонда агроинспекция туман бўлими бошлиғи 10 минг доллар пора билан қўлга тушгани ҳамда Сурхондарё вилояти Жарқўрғон туманида агроинспекция ходимлари пора олаётганда ушлангани ҳақида хабарлар берилган.