Наманганда бир ҳафта давомида 75 та оилавий меҳмон уйи давлат рўйхатига олинди. Бу ҳақда «Дарё» мухбири Азизбек Абдувалиев хабар бермоқда.
Жумладан, Давлат хизматлари марказлари ходимлари томонидан Янгиқўрғон туманидаги Нанай ҳудудида 59 та, Чустнинг Ғова ҳудудида 9 та ва Попнинг Чодак ҳудудида 7 та шундай ариза қабул қилинган.
ДХА вилоят бошқармаси ахборот хизматига кўра, мазкур тадбирларнинг деярли барчаси сайёр хизмат тарзида амалга оширилган.
Янгиқўрғон туманининг Нанай қишлоғи ҳудуди ички туризм йўналишида жуда катта салоҳиятга эга. Ҳозирда бу ердаги дам олиш масканлари нафақат жазирама ёз фаслида, балки куз-қиш мавсумида ҳам бирдек меҳмонларни қабул қилмоқда.
Жумладан, Нанайдаги қўшни Қирғизистон билан чегарадош «Сойбўйи» маҳалласида «Диёр» МЧЖ томонидан 5 гектар майдонда барпо этилаётган дам олиш масканида иккита 2 кишилик ва 9 та 4 кишилик кемпинглар, шунингдек, 7 та икки қаватли коттеж қурилмоқда.
Умумий қиймати 15 миллиард сўмга тенг лойиҳа амалга оширилганидан сўнг бу ерда йил давомида 12 минг киши дам олиши учун зарур шарт-шароитлар яратилади. Қолаверса, тоғ ён бағрида жойлашган масканда бронхиал астма ва бошқа касалликларни табиий даволаш имконияти яратилади.
Мавзуга доир:
Изоҳ (0)