Namanganda bir haftada 70 dan ortiq oilaviy mehmon uyi ro‘yxatga olindi

Namanganda bir hafta davomida 75 ta oilaviy mehmon uyi davlat ro‘yxatiga olindi. Bu haqda “Daryo” muxbiri Azizbek Abduvaliyev xabar bermoqda.

Jumladan, Davlat xizmatlari markazlari xodimlari tomonidan Yangiqo‘rg‘on tumanidagi Nanay hududida 59 ta, Chustning G‘ova hududida 9 ta va Popning Chodak hududida 7 та shunday ariza qabul qilingan.

DXA viloyat boshqarmasi axborot xizmatiga ko‘ra, mazkur tadbirlarning deyarli barchasi sayyor xizmat tarzida amalga oshirilgan.

Yangiqo‘rg‘on tumanining Nanay qishlog‘i hududi ichki turizm yo‘nalishida juda katta salohiyatga ega. Hozirda bu yerdagi dam olish maskanlari nafaqat jazirama yoz faslida, balki kuz-qish mavsumida ham birdek mehmonlarni qabul qilmoqda.

Jumladan, Nanaydagi qo‘shni Qirg‘iziston bilan chegaradosh “Soybo‘yi” mahallasida “Diyor” MChJ tomonidan 5 gektar maydonda barpo etilayotgan dam olish maskanida ikkita 2 kishilik va 9 ta 4 kishilik kempinglar, shuningdek, 7 ta ikki qavatli kottej qurilmoqda.

Umumiy qiymati 15 milliard so‘mga teng loyiha amalga oshirilganidan so‘ng bu yerda yil davomida 12 ming kishi dam olishi uchun zarur shart-sharoitlar yaratiladi. Qolaversa, tog‘ yon bag‘rida joylashgan maskanda bronxial astma va boshqa kasalliklarni tabiiy davolash imkoniyati yaratiladi.