Бўстонлиқ туманига олиб борувчи автомобиль йўлида дам олиш кунлари фоторадарлар орқали 2218 та қоидабузарлик аниқланган. Бу ҳақда Тошкент вилояти ИИББ Йўл ҳаракати хавфсизлиги бош бошқармаси матбуот хизмати хабар қилган.
Хабарга кўра, Республика махсус комиссиясининг йиғилиш баёнига мувофиқ карантин қоидалари юмшатилганлиги ва ички туризмга рухсат берилганлиги сабабли Тошкент вилоятининг Бўстонлиқ туманига дам олиш мақсадида ташриф буюрувчилар сони кўпайган. Туманга олиб борувчи 4Р12 Бектемир–Чирчиқ–Ғазалкент–Чорбоғ автомобиль йўлида дам олиш кунлари автомобиллар оқими кескин ошган.
Мазкур автомобиль йўлида йўл транспорт ҳодисаларининг олдини олиш ва автомобилларнинг ҳавфсиз харакатланишларини таъминлаш мақсадида махсус автоматлаштирилган фото ва видео қайд этиш техника воситалари онлайн режимда айнан йўл транспорт ҳодисалари кўп содир бўладиган жойларда ишлатилган.
Дам олиш кунлари мобайнида ушбу фоторадарлар орқали 2218 та белгиланган тезликни меъёридан ошириш ҳолатлари қайд этилган. Қоидабузарликларни содир этган фуқароларга нисбатан қонунчиликда белгиланган тартибда жарималар белгиланиб, чиқарилган қарорлар «Ўзбекистон почтаси»нинг маълумотларни қайта ишлаш маркази орқали қоидабузарлик содир этган ҳайдовчи ёки юридик шахснинг манзилига етказилган.
Таҳлилларга кўра, 4Р12 автомобиль йўлида 2019 йилнинг 1 июнидан 15 июнига қадар 3 та инсон ўлими билан боғлиқ йўл транспорт ҳодисаси содир бўлган бўлса, 2020 йилнинг мос даврида бу каби салбий ҳодисалар кузатилмаган.
Изоҳ (0)