Швейцария полицияси 8 ёшли бола қишлоқ дўконида ўйинчоқ пул билан тўловни амалга ошириш мумкинми йўқми, деб сўраганидан сўнг уни 12 йилга қоидабузарлар базасига киритди, деб ёзмоқда The Local Switzerland.
Маълум бўлишича, бола апрель ойи охирларида 10 ёшли акаси ва қўшни қизча билан маҳаллий қишлоқ дўконларидан бирига кирган ва ўйинчоқ пул билан тўловни амалга оширса бўладими, деб сўраган.
Пул сохта эканлиги кўриниб турганига қарамай, дўкон ходимлари полиция чақиртирган. «Бу бизнинг вазифамиз, сохта пул муомилага киритишга уринишнинг ҳар қандай ҳолатда шундай йўл тутишга кўрсатма берилган», — деган дўкон менежери.
Basler Zeitung’нинг қайд этишича, боладаги пул оддий қоғозда чоп этилган евро банкнотаси бўлиб, унда хитойча иероглифлар босилган. Бундай пулларни хитойликлар «марҳумнинг қабрдаги ҳаёти муваффақиятли кечиши учун» дафн маросимларида ёқиб юборади. Guardian’нинг ёзишича, бундай пуллар март ойида Швейцариянинг Сиссач коммунасида ўтказилган карнавалда тарқатилган, бола уни эҳтимол ўша вақтда олган бўлиши мумкин.
Боланинг уйидан ҳам 10, 20 ва 50 евро қийматдаги шундай сохта купюралар топилган ва «жиноятнинг олдини олиш мақсадида» олиб қўйилган.
Болага нисбатан айблов қўйилмаган, лекин полиция уни адвокатлар иштирокисиз сўроқ қилган ва жиноятчиларни суратга олгандек расмга олган ҳамда у ҳақдаги маълумотларни полиция базасига киритган.
Кейинчалик дўкон маъмурияти юз берган воқеа юзасидан узр сўраган ва болаларга полиция чақириш ўрнига шунчаки огоҳлантириш бериш кераклиги хаёлларига келмаганини таъкидлаган. Дўкон менежерининг айтишича, ходимларининг бирортасининг фарзандлари йўқ.
Изоҳ (0)