Шимолий Корея ташқи ишлар вазири Ли Сон Гвон КХДР ва АҚШ муносабатлари икки мамлакат ўртасидаги тарихда биринчи марта бўлиб ўтган саммитдан роппа-роса икки йил ўтиб, «умидсизлик нуқтаси»га етганини маълум қилди. Бу ҳақда «РБК» хабар берди.

КХДР ташқи ишлар вазирининг қайд этишича, КХДР етакчиси Ким Чен Ин ва АҚШ президенти Дональд Трампнинг учрашувидан кейин 732 кун ўтди, энди эса бутун дунё нимага гувоҳ бўлгани ва бундан қандай дарс олганини англаш зарур. «Асосийси, икки йил аввал дунё жамоатчилиги диққат марказида турган Шимолий Корея ва АҚШ ўртасидаги муносабатлар яхшиланишига бўлган умид энди умидсизлик билан алмашгани бўлди», — деди вазир.

Вазирнинг таъкидлашича, бу умидсизлик шу даражага етдики, «ҳатто Корея яриморолидаги тинчлик ва фаровонликка бўлган умид ва оптимизмнинг ингичка нури ҳам сўнди». Ли Сон Гвоннинг қайд этишича, икки мамлакат халқларининг дунёдаги энг муросасиз муносабатларга чек қўйишга ҳамда тинчлик ва фаровонлик эрасини очишга интилиши «ҳар қачонгидан кўра буюкроқдир».

Унинг фикрича, Корея яриморолидаги вазият кун сайин ёмонлашмоқда, КХДР эса ҳали ҳам Вашингтоннинг огоҳлантирувчи ядро зарбаси нишонлари рўйхатида турибди. «АҚШ эгалик қиладиган ядро қуролларининг ҳар қандай тури бевосита КХДРга қаратилган», — деб ҳисоблайди вазир.

АҚШ ва Шимолий Корея етакчилари иштирокидаги тарихдаги биринчи саммит 2018 йил 12 июнда бўлиб ўтган. Ўшанда Дональд Трамп ва Ким Чен Ин Сингапурда учрашган ва декларация имзолаган. Ҳужжатга кўра, КХДР ядросизланиш мажбуриятини олган, бунга жавобан Вашингтон КХДРга хавфсизликни кафолатлаши керак бўлган.

Трамп ва Шимолий Корея етакчисининг иккинчи учрашуви 2019 йил февраль ойида Вьетнамда бўлиб ўтди. Музокаралар доирасида қўйилган мақсадларга эришиш учун аниқ ҳаракатларни ишлаб чиқиш режалаштирилганди, бироқ учрашув ҳеч қандай расмий ҳужжатнинг имзоланишисиз якунланган. 2019 йилнинг июнь ойида икки давлат раҳбарлари Шимолий ва Жанубий Корея ўртасидаги демилитаризация қилинган ҳудудда учинчи марта учрашди ва ишчи даражада музокараларни қайта тиклашга келишиб олди. Бироқ ишчи гуруҳларнинг Стокгольмда бўлиб ўтган кейинги учрашуви натижасиз якунланди. Пхенян Вашингтонда муносабатларни 2019 йилнинг охиригача тартибга солишни талаб қилди, бироқ бу талаб бажарилмади.

Аввалроқ Шимолий Корея АҚШни ўз обрўсига путур етказишда айблаганди. Шунингдек, КХДР Жанубий Кореянинг қўнғироқларига жавоб бермади ва 2018 йилдан бери биринчи бор Жанубий Корея билан алоқаларни тўхтатди.