Европа комиссияси Шенген мамлакатлари ички чегараларида 15 июндан бошлаб чекловларни олиб ташлаш мумкин деб ҳисоблайди. Бу ҳақда Европа комиссиясининг ички ишлар бўйича аъзоси Ильва Йохансон маълум қилди, деб ёзмоқда «Интерфакс».
Йохансон Брюсселда 11 июнь куни бўлиб ўтган матбуот анжуманида «Биз бу мамлакатларга ички чегараларда душанба кунидан бошлаб чекловларни олиб ташлашни таклиф қиламиз», деган.
Унинг сўзларига кўра, мазкур мамлакатларда эпидемиологик вазият етарли даражада яхшиланган. Уларнинг барчаси Еврокомиссия томонидан тавсия қилинган эҳтиёт чораларини қўлламоқда ва бу чекловларни олиб ташлашга имкон беради.
Унинг қайд этишича, ташқи чегаралардаги вазият ҳам муҳокама қилинган ва Европа комиссияси Иттифоқнинг ташқи чегаралари орқали мажбурий бўлмаган сафарларга 15 июнгача қўйилган тақиқни яна икки ҳафтага — 30 июнгача узайтириш ҳақидаги фикрга келган.
«Бу чекловларни ҳозирча бирданига олиб ташлаб бўлмайди. Буни босқичма-босқич амалга оширамиз», — деди Йохансон.
Бунинг учун эпидемиологик вазиятни ҳисобга олган ҳолда Европа Иттифоқи билан 1 июндан чегараларини очишни бошлайдиган мамлакатларнинг янгиланган рўйхати тузилади.
Еврокомиссарнинг билдиришича, ташқи чегараларда чекловларни олиб ташлашда учта омил ҳисобга олинади. Маълум бир мамлакат учун чекловларни олиб ташлаш ҳақидаги қарор мазкур мамлакатдаги эпидемиологик вазият ва унинг коронавирус эпидемиясига қарши реакциясига, сафарлар вақтида коронавирус тарқалишининг олдини олиш чораларининг қўлланилишини таъминлай олиш имкониятига, шунингдек, мазкур мамлакат томонидан Европа Иттифоқига сафарларга қўйилган чекловларнинг олиб ташланишига асосланиши керак.
Еврокомиссия тавсияларида айтилишича, баъзи мамлакатларда соғлиқни сақлаш тизимидаги вазият таҳликали бўлиб қолаётганини ҳисобга олган ҳолда комиссия мазкур босқичда бу мамлакатлар учун сафарларга қўйилган чекловларни олиб ташлашни таклиф қилмайди.
Комиссия фикрича, чекловларни дастлаб эпидемиологик вазияти Европа Иттифоқидаги ўртача вазият билан бир хил бўлган ва вирусга қарши кураш учун етарлича имкониятга эга мамлакатлардан олиб ташлаш керак бўлади. Вазият Европа Иттифоқидагидан ёмонроқ бўлган давлатлар учун чекловлар ўз кучида қолиши керак, деб ҳисоблайди Европа комиссияси.
Аввалроқ дунёда карантин чекловларини бекор қилаётган мамлакатлар сони ортиб бораётгани ҳақида хабар берилганди.
Изоҳ (0)