Адлия вазири ўринбосари: Давлат хизматини тартибга солиш бўйича қонун қабул қилишга сиёсий ирода йўқ эди

Адлия вазири ўринбосари Баҳром Қўчқоров Давлат хизмати тўғрисидаги қонун шу вақтгача нега қабул қилинмагани юзасидан саволларга жавоб берди. Бу ҳақда у Адлия вазирлигида ташкил этилган «Давлат фуқаролик хизмати тўғрисида»ги қонун лойиҳаси муҳокамасига бағишланган матбуот анжуманида тўхталиб ўтди, дея хабар берди «Дарё» мухбири.

Хусусан, вазир ўринбосари 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси асосида нафақат қонун тарафдан давлат хизматини тартибга солиш, балки давлат хизматини тубдан ислоҳ қилишни бошлаб берганини қайд этди.

«Давлат хизматини тартибга солиш, қонун лойиҳасини ишлаб чиқиш кеча бошланган иш эмас. Бу 1990 йилларга бориб тақалади, ўша вақтларда ҳам қонун лойиҳалари бир неча бор ишланган, 2005 йилда ҳам халқаро экспертлар бошчилигида кўплаб лойиҳалар қилинди. Лекин идоралараро ёки экспертлар муҳокамасидан ўтмаган. Буни қабул қилишга сиёсий ирода йўқ эди. 2017 йилда Президентнинг сиёсий иродаси билан стратегия қабул қилинди», — дейди Қўчқоров.

2019 йилнинг 3 октябридаги Ўзбекистон Республикасида кадрлар сиёсати ва давлат фуқаролик хизмати тизимини тубдан такомиллаштириш чора-тадбирлари тўғрисида»ги фармони ва «Ўзбекистон Республикаси Президенти ҳузуридаги Давлат хизматини ривожлантириш агентлиги фаолиятини ташкил этиш чора-тадбирлари тўғрисида»ги қарорига кўра қонун лойиҳаси нуфузли хорижий ташкилотлари мутахассис ва экспертларининг тавсиялари асосида ишлаб чиқилгани, кенг жамоатчилик фикри муҳокамаси билан қонун такомиллаштирилиши таъкидланди.

Шунингдек, брифингда лойиҳа ҳақида Давлат хизматини ривожлантириш агентлиги директор ўринбосари Нодиржон Максумов ҳам фикрини билдириб ўтган.

Жумладан, Максумов Президентнинг 2017 йилда Парламентга қилган мурожаатида давлат фуқаролик хизмати тўғрисидаги чақириғига асосан Давлат хизматини ривожлантириш агентлиги томонидан «Давлат фуқаролик хизмати тўғрисида»ги қонун лойиҳаси ишлаб чиқилганини қайд этди. Шу йилнинг 22 май куни жамоатчилик муҳокамасига қўйилган лойиҳа бўйича жами 1001 дан ортиқ мурожаатлар келиб тушган. Лойиҳада МДҲ мамлакатлари, Сингапур, Япония, Жанубий Корея, Европа тажрибаси кўрилган.

Лойиҳа давлат ҳокимияти ва бошқарув органларини юқори малакали кадрлар билан таъминлаш, улар билан доимий ишлаш, малакасини ошириб бориш, уларнинг масъулияти, мутахассислар захирасини шакллантириш масалаларини ҳал этиш учун асос бўлишини гапириб ўтди. Лойиҳа билан давлат фуқаролик хизматчиси ҳуқуқий мақоми, хизматнинг ташкилий-ҳуқуқий асосларини яратиш, касбга оид сифатлари, алоҳида хизматларини объектив танлов асосида хизмат поғоналарида ўсиш кафолатларини ўрнатиш, давлат фуқаролик хизматига кириш, ўташ ва тугатиш жараёнларини тартибга солиш муносабатларнинг барчаси назарда тутилган. Лойиҳага берилаётган таклиф-мунозаралар, саволлар мутахассислар ҳамда вазирлик-идоралардан масъуллар иштирокида яна бир марта кўриб чиқилиши, зарур бўлганда ўзгартиш ва қўшимчалар киритилиши билдирилди.