Италиялик вирусолог, Миландаги Vita-Salute San Raffaele университети проректори Массимо Клементи кузда COVID-19 пандемиясининг иккинчи тўлқини юз бермаслиги мумкинлигини билдирди. У бу ҳақда у «РИА Новости»га берган интервьюсида маълум қилди.
«Агар вирус вирулентлиги (касал юқтириш, тарқатиш хусусияти) биз ўйлагимиздек аста-секин камайса, бу йилги қишда юзага келган вазият такрорланмайди», — дейди вирусолог кузда пандемиянинг иккинчи тўлқини келиши эҳтимоли ҳақидаги саволга жавобан.
Унинг айтишича, иккинчи тўлқиннинг бўлмаслигини San Raffaele касалхонасида Клементи бошчилигида микробиология ва вирусология лабораторияси ходимлари томонидан олиб борилган тадқиқотлар гувоҳлик бермоқда.
Тадқиқот давомида олимлар 1 мартдан 15 мартгача касалхонага қабул қилинган 100 нафар беморни, шунингдек, май ойининг иккинчи ярмида касалхонага ётқизилган 100 беморни таққослаган. Натижада мутахассислар эпидемиянинг дастлабки босқичида вирус юки (вирусли инфекциянинг ўлчов бирлиги бўлиб, муайян ҳажмидаги биологик суюқликдаги вирус заррачалари сонини баҳолаш орқали ҳисобланади) май ойи охирига қараганда ўн баравар кўп бўлган, деган хулосага келди.
Клементининг фикрича, сўнгги вақтларда вирус юкининг камайиши билан касалланиш ҳолати даражаси ҳам яхшиланиб бормоқда. Бу эса, экспертнинг таъкидлашича, коронавируснинг ўзи ҳам заифлашиб бораётганини билдиради. «Ҳозирча биз буни тўлиқ ишонч билан айта олмаймиз, аммо, катта эҳтимол билан айнан шундай», — дея қўшимча қилган профессор.
Олимнинг таъкидлашича, вируснинг заифлашаётгани ҳақидаги хулосани унга эпидемиянинг турли босқичларида бўлган бир қатор мамлакатлардан келаётган маълумотлар ҳам тасдиқламоқда.
Унинг тахминича, янги коронавирус тез орада шу қадар заифлашадики, «бошқа коронавируслар сингари одамларда фақат оддий нафас олиш йўллари касалликларини келтириб чиқаради холос».
Эслатиб ўтамиз, аввалроқ Италия Соғлиқни сақлаш олий институти президенти Сильвио Брузаферро коронавируснинг иккинчи тўлқини кузда юз бериши мумкинлигини тахмин қилганди. Буюк Британия экспертлари эса карантин чекловларини тезда бекор қилиш коронавируснинг иккинчи тўлқинини юзага келтириши мумкинлигидан огоҳлантирганди. Хитойда коронавируснинг янги тўлқини қачон содир бўлиши прогноз қилинган.
Изоҳ (0)