Қозоғистон ва Қирғизистон давлат чегараларидаги барча ўтказиш пунктларини очиш ва икки мамлакат ўртасида юк ташувларининг ҳеч қандай муаммосиз таъминланишига келишиб олди. Бу ҳақда 10 июнь куни Қозоғистон бош вазири Асқар Мамин ва Қирғизистон бош вазири Муҳаммадкалий Абилгазиев ўртасида бўлиб ўтган телефон мулоқотидан сўнг, маълум бўлди.
Шунингдек, томонлар коронавирус тарқалишига қарши ўзаро ҳамкорлик ҳамда аҳолини ундан ҳимоя қилиш масалаларини ҳам муҳокама қилган.
Аввалроқ Қирғизистон Иқтисодиёт вазирлиги Қозоғистонни Евросиё иқтисодий иттифоқи (ЕОИИ) мамлакатларининг товарлар, шу жумладан, ижтимоий аҳамиятга эга ва озиқ-овқат маҳсулотлари эркинлиги тўғрисидаги келишувига риоя қилмаганликда айблаган эди. Идора маълумотларига кўра, Қозоғистон еттита назорат пунктидан бештасини ёпиб қўйган ва машиналар чегарадан ўтишда 3-4 кунлаб қолиб кетган. Бу вақтда эса Қирғизистон чегарасидан ўтиш ишлари уч баробар тезроқ амалга оширилган.
Қозоғистон Савдо ва интеграция вазирлиги республика бир йилдан кўпроқ вақтдан бери қўшни давлатни рақамли технологиялардан кенг фойдаланган ҳолда товарлар ҳаракатида ошкоралик масаласини ҳал этиш, ҳаракатланаётган транспорт воситалари тўғрисида маълумотларни алмашиш, юк машиналарига электрон муҳрларни қўллашга чақириб келаётгани, бироқ «Бишкек Нур-Султоннинг конструктив таклифларини ‘эшитмаётгани’ни» маълум қилганди.
Аввалроқ Тошкент—Душанбе ўртасидаги авиақатновлар 1 июлдан қайта йўлга қўйилиши мумкинлиги ҳақида хабар берилганди.
Изоҳ (0)