АҚШда коронавирус билан касалланганлар сони 2 миллион кишидан ошди. Бу ҳақда касаллик тарқалишини реал вақтда кузатиб бораётган Жонс Ҳопкинс университети маълумотларида келтирилган.
Маълумотларга кўра, АҚШга ҳозирга қадар COVID-19 оқибатида 112 мингдан ортиқ одам вафот этган.
Коронавирус билан касалланиш бўйича янги ҳолатлар афроамерикалик Жорж Флойднинг ўлими сабаб давом этаётган оммавий норозилик намойишлари фонида аниқланмоқда. АҚШ вице-президенти Майкл Пенснинг маълум қилишича, ҳукумат норозилик намойиши бошланганидан бери икки ҳафта давомида янги касалланиш ҳолатлари ўсмаётганини қайд этмоқда. Унинг таъкидлашича, намойиш иштирокчиларининг аксарияти ниқобдан фойдаланмоқда ва иложи борича ижтимоий масофаланишга риоя қиляпти.
Университет маълумотларга кўра, бутун дунё бўйлаб коронавирус инфекциясини юқтириб олганлар сони 7,3 миллион кишидан ошган. Касаллар сони бўйича дунёда биринчи ўринда АҚШ (жами касалларнинг 27 фоизи) кетмоқда. Иккинчи ўриндан — Бразилия (740 минг бемор) ўрин олган бўлса, Россия 493 минг касалланиш ҳолати билан учинчи поғонада кетмоқда. Уларнинг ортида Буюк Британия (291 мингдан ортиқ) ва Ҳиндистон (276 минг) жой олган.
8 июнь куни Жаҳон соғлиқни сақлаш ташкилоти раҳбари Тедрос Гебрейесус дунёда коронавирус билан боғлиқ вазият ёмонлашаётганини маълум қилганди.
Эслатиб ўтамиз, 29 майда ЖССТ коронавирус инфекциясидан вафот этган беморлар сони 350 минг нафардан ошганини маълум қилган. 26 май куни бутун дунёда коронавирус инфекцияси билан касалланганлар сони 5,5 миллиондан, 21 майда 5 миллиондан, 31 майда эса 6 миллиондан ошиб кетгани хабар қилинган эди. 8 июнь куни бутун дунёда коронавирус билан касалланганлар сони 7 миллиондан ошган.
Изоҳ (0)