Ўзбекистон Олий Мажлиси Сенатининг бешинчи ялпи мажлиси 2020 йил 19 июнь куни чақирилади. Бу ҳақда 11 июнь, пайшанба куни бўлиб ўтган Сенат кенгашининг мажлисида маълум қилинди.
Видеоконференцалоқа шаклида ўтказиладиган ялпи мажлисда бир қатор долзарб масалалар кўриб чиқилиши режалаштирилган.
Маълум қилинишича, ялпи мажлисда «Инновацион фаолият тўғрисида»ги, «Ов қилиш ва овчилик хўжалиги тўғрисида»ги, «Фуқароларнинг жамоат тартибини сақлашда иштирок этиши тўғрисида»ги, «Геодезия ва картография фаолияти тўғрисида»ги қонунлар кўриб чиқилади.
Бундан ташқари, «‘Энергиядан оқилона фойдаланиш тўғрисида”ги қонунга ўзгартириш ва қўшимчалар киритиш ҳақида»ги, «Ўзбекистон Республикасининг Жиноят-ижроия кодексига маҳкумларнинг ҳуқуқлари ва қонуний манфаатлари ишончли ҳимоя қилинишини таъминлашга қаратилган ўзгартиш ва қўшимчалар киритиш тўғрисида»ги, «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунлар сенаторлар томонидан муҳокама қилинади.
Шунингдек, «‘2007 йил 27 июндаги Шанхай ҳамкорлик ташкилотига аъзо давлатлар ўртасида ҳамкорликдаги ҳарбий ўқувларни ўтказиш тўғрисидаги битимга қўшимчалар киритиш ҳақида’ги баённомани ратификация қилиш тўғрисида»ги, «Ўзбекистон Республикасининг ‘Бўғувчи, заҳарли ёки бошқа шу каби газлар ва бактериологик воситаларнинг урушда қўлланилишини тақиқлаш тўғрисидаъги протоколга қўшилиши ҳақида»ги қонунлари ҳам ялпи мажлис кун тартибига киритилади.
Шу билан бирга, адлия вазирининг Ўзбекистон Республикасида 2019 йилда ҳуқуқий тарғибот ва маърифат соҳасида амалга оширилган ишлар юзасидан ахбороти, қолаверса, Самарқанд вилояти ҳокимининг ҳудудларни ривожлантириш ҳамда халқ депутатлари маҳаллий Кенгашлари фаолияти ҳақидаги ҳисоботи эшитилиши назарда тутилган.
Йўл ҳаракати хавфсизлигини таъминлашга оид қонун ҳужжатларининг ижро этилиши ҳолати, шунингдек, чиқиндилар билан боғлиқ масалаларда вужудга келган муаммолар ва уларнинг аҳоли саломатлигига таъсири юзасидан Вазирлар Маҳкамасига парламент сўровлари юбориш масаласи кўриб чиқилади.
Эслатиб ўтамиз, карантин чекловлари сабабли Сенатнинг учинчи ва тўртинчи ялпи мажлислари ҳам видеоконференцалоқа шаклида бўлиб ўтганди.
Изоҳ (0)