Ўзбекистон Фанлар академияси О.С.Содиқов номидаги биоорганик кимё институти олимлари SARS CoV-2 коронавируси таъсирини 78,3 фоизга сусайтириш хусусиятига эга бўлган «Рутан» номли дорини яратгани ҳақида хабар берилганди. Таъкидланишича, бу янги дори воситаси эмас, у ўзбекистонлик олимлар томонидан 2015 йилда ишлаб чиқарилган.
Февраль ойининг охирларида ўтказилган матбуот анжуманида Фармацевтика тармоғини ривожлантириш агентлиги Фан ва таълимни ривожлантириш бошқармаси бошлиғи Азиз Дўсматов ушбу дори воситасининг хусусиятлари ҳақида сўзлаб берганди.
Унинг коронавирусга таъсири ҳали ўрганилиши керак. Лекин грипп вирусларининг турли штаммларига қарши самараси исботланган.
«Рутан препарати интерферон активловчи универсал дори воситасидир. У олимларимиз томонидан ишлаб чиқарилган ва организмнинг иммунитетини ошириш орқали гриппга қарши курашади», – дея таъкидлаганди Азиз Дўсматов.
Фармацевтика тармоғини ривожлантириш агентлигининг маълум қилишича, 9 июнь куни Инновацион ривожланиш вазирлиги China—Uzbekistan Medicine Technical Park технопаркида ишлаб чиқилган 19 500 дона «Рутан» дори воситасини Ўзбекистон Соғлиқни сақлаш вазирлигига беғараз тақдим этган.
Аввалроқ Ўзбекистон Инновацион ривожланиш вазирлиги ҳузуридаги Илғор технологиялар маркази ходимлари коронавирусни аниқлаш учун тест тизимини ишлаб чиқиш устида иш олиб бораётгани ва мазкур тест тизимлари Тошкентда коронавирусга чалинган беморларда синовдан ўтказилаётгани ҳақида хабар берилганди.
Изоҳ (0)