Адлия вазирлигининг Давлат хизматлари агентлиги томонидан ўтказилган ўрганишлар давомида ваколатли ташкилотлар томонидан «Ерелектрон» ААТ орқали ер участкаларини олиш учун хулоса беришда 2,3 мингдан ортиқ қонун бузилиши ҳолатларига йўл қўйилгани аниқланган. Бу ҳақда Давлат хизматлари агентлиги бош маслаҳатчиси Исомиддин Латипов маълум қилган.
Исомиддин Латипов берган маълумотларга кўра, сув таъминоти идоралари томонидан 536 та, электр таъминоти корхоналари томонидан 402 та, кадастр идоралари томонидан 359 та, қурилиш бўлимлари томонидан 340 та, газ таъминоти корхоналари томонидан 290 та, «Ўзтелеком» АЖ томонидан 154 та, ҳокимликлар томонидан 102 та, маданий мерос идоралари томонидан 77 та, экология органлари томонидан 50 та, солиқ органлари томонидан 37 та ҳолатда ер участкаларини танлаш материалларини келишиш ва хулосалар беришда қонун бузилишига йўл қўйилган.
ДХА томонидан ушбу ҳолатларни бартараф этиш мақсадида ваколатли ташкилотларга 13 та тақдимнома ва 324 та огоҳлантириш киритилган. Қонун бузилиши ҳолатларига йўл қўйган 158 нафар масъул ходимга нисбатан маъмурий жавобгарлик чораси қўлланилган.
Қурилиш органларининг 33 нафар, электр тармоқлари корхоналарининг 32 нафар, сув таъминоти корхоналарининг 31 нафар, газ таъминоти корхоналарининг 20 нафар, «Ўзтелеком» АЖнинг 12 нафар, кадастр идораларининг 11 нафар, солиқ идораларининг 10 нафар, маданий мерос идораларининг 4 нафар, экология идораларининг 3 нафар ва маҳаллий ҳокимликларнинг 2 нафар масъул ходимларига нисбатан маъмурий жарима қўлланилган.
Давлат хизматлари агентлиги бош маслаҳатчиси мисол тариқасида Сурхондарё вилояти ер тузиш ва кўчмас мулк кадастри давлат корхонаси Жарқўрғон туман филиали масъул ходими С.Т. ер участкаси ҳақидаги маълумотларни «Ерелектрон» ААТга белгиланган тартибда киритмаганини, шунингдек, Самарқанд вилояти Каттақўрғон шаҳар қурилиш бўлими ходими Н. Х. томонидан ушбу тизимга жойлаштирилган ер участкаси бўйича тегишли хулоса ўз вақтида берилмаганини келтириб ўтган.
Шу билан бирга, Хоразм вилояти Хонқа туман электр таъминоти корхонаси масъул ходими С.Х. техник шартларни ишлаб чиқишда муддат бузилишига йўл қўйгани, Қашқадарё вилояти «Сувоқова» ДУК Косон тумани филиалининг масъул ходими Ф.О. томонидан ер участкаси бўйича техник шарт 15 кунга кечиктирилиб берилгани ҳақида маълумот бериб, мазкур ҳолатлар бўйича масъул шахсларга нисбатан Маъмурий жавобгарлик тўғрисидаги кодекснинг 215-моддаси 5-қисмига асосан базавий ҳисоблаш миқдорининг 3 баравари миқдорида жарима жазоси қўлланилганини билдирган.
Мавзуга доир: ДХА тезкор хизматлар учун алоҳида тарифлар жорий этилгани ҳақидаги хабарларга изоҳ берди
«Аслида тадбиркорлик учун ер участкаларини ажратишда ваколатли ташкилотлардан кўп нарса талаб қилинмайди, ўзларига юклатилган вазифалар ижросини ўз вақтида таъминлаб қўйишса кифоя.
Президент қарорига асосан қишлоқ хўжалигига мўлжалланмаган бўш турган ер участкаларини E-ijro auksion савдо майдончаси орқали доимий фойдаланишга бериш тартиби жорий этилган.
Аукционга чиқариладиган ер участкасини танлаш материалларини келишиш ва у бўйича хулосалар бериш жараёни ваколатли ташкилотлар томонидан фақат электрон шаклда «Ерелектрон» ААТ орқали амалга оширилиши белгиланган.
Бу билан тадбиркорлик субъектларига тадбиркорлик фаолиятини амалга ошириш учун ер участкаларини ажратишда бюрократик тўсиқларни бартараф этиб, ушбу жараёнда шаффофликни таъминлашга эришилди.
Мазкур тартиб бўйича ҳозирги вақтга қадар 711 та ер участкаси тадбиркорлик ва шаҳарсозлик фаолиятини амалга ошириш учун электрон онлайн аукцион савдолари орқали сотилган», – деган Давлат хизматлари агентлиги бош маслаҳатчиси.
Изоҳ (0)