Жиззах вилояти Дўстлик туманида тўрт кишининг номига кредит расмийлаштириб, бу маблағларни ўзлаштирган «Микрокредитбанк» бўлим бошлиғига нисбатан жиноят иши очилди. Бу ҳақда «Дарё»га Бош прокуратура маълум қилди.
Хабар берилишича, Бош прокуратура ҳузуридаги Иқтисодий жиноятларга қарши кураш департаментнинг Дўстлик туман бўлими томонидан фуқаро С. А.нинг Бош прокуратура ишонч телефонига қилган мурожаатига асосан терговга қадар текширув ўтказилган.
Аниқланишича, «Микрокредитбанк»нинг Дўстлик филиали амалиёт бўлими раҳбари Ш. Б. ва бошқалар мансаб ваколатини суиистеъмол қилиб, С. А. ва яна уч нафар фуқаронинг номига уларнинг рухсатисиз «Ҳар бир оила — тадбиркор» дастури доирасида имтиёзли кредит ҳужжатларини расмийлаштириб, парранда ва чорва моллари хариди учун 120 миллион сўмни таъминотчи корхоналарга ўтказиб талон-торож қилган.
Мазкур ҳолат юзасидан Ш. Б. ва бошқаларга нисбатан Жиноят кодексининг 167-моддаси 3-қисми ва 209-моддаси 1-қисми билан жиноят иши қўзғатилиб, тергов ҳаракатлари ўтказилмоқда.
Аввалроқ «Агробанк»нинг Хоразм вилояти Гурлан туманидаги филиали собиқ раҳбари 400 миллион сўмлик кредит маблағларини ўзлаштиргани учун жиноят иши очилганди.
Изоҳ (0)