«Ўзгидромет»нинг май ойидаги мониторинги бўйича Олмалиқ атмосфера ҳавоси энг ифлос шаҳар бўлиб чиқди

«Ўзгидромет» томонидан 2020 йил май ойида ўтказилган атмосфера ҳавоси ифлосланиши мониторинги натижаларига кўра, 24 та шаҳарда ҳавонинг ифлосланиш даражаси паст бўлган, юқори ифлосланиш даражаси Олмалиқ шаҳрида АИИнинг 8,85 га тенг қиймати билан қайд этилган, дейилади марказ хабарида.

Хабарга кўра шаҳарларда атмосфера ҳавоси ифлосланиши саноат корхоналари ажратмаларининг тарқалиши ва метеошароитларга боғлиқ. Умуман, республика бўйича 2020 йил майда атмосфера ҳавосининг ифлосланиш даражаси меъёр чегарасида бўлган.

Ўтказилган радиациявий мониторинг бўйича 2019 йил майда радиациявий гамма-фоннинг ўртача қийматлари рухсат берилган меъёр (0,30 мкз/ч)дан ошмаган.

Республика бўйича ўртача гамма-фон қиймати 0,15мкЗв/ч’ни ташкил қилган.

Шаҳар атмосфера ҳавоси ифлосланиш даражасини тавсифлаш учун стандарт интеграл кўрсаткич — атмосферанинг ифлосланиш индекси (АИИ)дан фойдаланилади, у бешта асосий ифлослантирувчи ингредиент (чанг, олтингугурт диоксиди, углерод оксиди (ис гази), азот диоксиди, азот оксиди) бўйича ҳисобланади. АИИнинг 5 баллдан кам қиймати паст ифлосланиш даражасига тўғри келади.

Ҳавонинг ифлосланиш даражаси АИИ 0-4 бўлганда паст, АИИ 5-6 бўлганда ошган ва АИИ 7-14 бўлганда юқори, АИИ> 14 бўлганда энг юқори ҳисобланади.

2019 йил сентябрда Тошкент жаҳоннинг ҳавоси энг ифлос шаҳарлари рейтингида 2-ўринни эгаллаган, «Ўзгидромет» ушбу маълумотга муносабат билдириб, мазкур маълумотлар вақтинчалик, иқлим ва географик шароитларга боғлиқлигини қайд этганди. Кейинчалик мазкур марказ 20 йил ичида Тошкент шаҳри учун ифлосланиш даражаси ўзгаришларини кўриб чиқиб, 1990 йилларга нисбатан охирги 10 йил ичида Тошкент бўйича ифлосланиш даражаси пасайганини билдирган.