Давлат хавфсизлик хизмати Навоий вилояти бошқармаси ва вилоят ички ишлар бошқармаси ходимлари ҳамкорлигида ўтказилган тезкор тадбир давомида 996 дона «Трамадол» олиб кетаётган шахс қўлга олинди. Бу ҳақда «Дарё»га ДХХ томонидан хабар берилди.
Маълум қилинишича, Нурота тумани ҳудудида ҳаракатланаётган Ж.Б. бошқарувидаги Lacetti машинаси тўхтатилиб текширилганда, автомашина салонида 996 дона «Трамадол» дори воситаси борлиги аниқланди ва холислар иштирокида расмийлаштириб олинди.
Ҳозирда мазкур ҳолат юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Маълумот учун, Вазирлар Маҳкамасининг 2018 йил 27 октябрдаги 878-сонли қарорига мувофиқ, «Трамадол» дори воситаси гиёҳвандлик воситалари рўйхатига киритилган.
Аввалроқ Қорақалпоғистонда қарийб 10 минг дона «Трамадол» олиб кетаётган шахслар ДХХ томонидан қўлга олингани ҳақида хабар берилганди.
Изоҳ (0)