Андижон вилоятининг Жалақудуқ туманидаги «Бузрукхонтўра» маҳалласида жойлашган қабристон ҳудудидаги икки туп чинор дарахтини рухсатсиз кесган фуқаро шахси аниқланиб, жаримага тортилди. Бу ҳақда «Дарё» мухбири Умиджон Мамарасулов хабар берди.
Мазкур ҳолат Экология ва атроф-муҳитни муҳофаза қилиш соҳасидаги назорат бўйича Жалақудуқ тумани инспекцияси томонидан ўтказилган рейд тадбирлари давомида маълум бўлган.
Аниқланишича, мазкур ҳаракатни Ойим шаҳарчаси, Нодира кўчасида яшовчи фуқаро Ю.З. амалга оширган.
Ҳолат бўйича фуқаро Ю.З.га нисбатан Маъмурий жавобгарлик тўғрисидаги кодекснинг 79-моддаси 1-қисми билан 1 миллион 115 минг сўм жарима қўлланилган. Бундан ташқари 6 миллион 88 минг сўм миқдоридаги зарарни ундириш бўйича туман прокуратурасига маълумотнома киритилган.
Эслатиб ўтамиз, 2019 йилнинг 30 октябридаги Президент фармони билан давлат ўрмон фондига киритилмаган қимматли дарахт ва буталарни кесишга 2020 йил 31 декабрига қадар мораторий эълон қилинган. Ушбу давр мобайнида қимматли дарахт ва буталарни кесишга рухсатнома берилиши тақиқланган.
Изоҳ (0)