Хивада фуқарони қўрқитиб, 1 миллиард сўм талаб қилган шахс қўлга олинди. Бу ҳақда Бош прокуратура «Дарё»га маълум қилди.
Маълумотларга кўра, Ж.Б. исмли шахс бошқа бир фуқаронинг Г. исмли таниши билан жинсий алоқада бўлганлиги тасвирланган видеоси борлигини айтиб, агар йил бошида 500 миллион сўмга сотган бино-иншоотини 1 миллиард сўмга қайта сотиб олмаса, тасвирларни интернетда тарқатиш билан қўрқитган.
Бош прокуратура ҳузуридаги департаментнинг Хива туман бўлими томонидан ИИБ ходимлари билан ҳамкорликда ўтказилган тезкор тадбирда Ж.Б. 90 миллион сўм ва 20 минг АҚШ долларини товламачилик йўли билан олган вақтида ушланган.
Ҳолат юзасидан Ж.Б.га нисбатан товламачилик бўйича жиноят иши қўзғатилган. Тергов ҳаракатлари ўтказилмоқда.
Аввалроқ Тошкентда 22 ёшли қизнинг эҳтиросли суратларини интернетга тарқатиш билан қўрқитиб, 800 доллар талаб қилган йигит ушлангани ҳақида хабар берилганди.
Изоҳ (0)