Тошкентнинг Амир Темур хиёбони, Бухоро ва Нуронийлар кўчалари оралиғида жойлашган газеталар ишлаб чиқариш мажмуаси биноси қисми ҳамда Бухоро кўчаси, 10-уй манзилидаги собиқ Свердлов номидаги концерт зали (биржа биноси) асосий фаолият тури макарон маҳсулотлари ва шунга ўхшаш унли маҳсулотлар ишлаб чиқариш бўлган Forsa Barsa компаниясига танловсиз, тўғридан-тўғри ноль қийматда тақдим этилаётгани ҳақида хабарлар тарқалганди. Давлат активларини бошқариш агентлиги бу хабарлар асоссиз эканлигини маълум қилди.
Қайд этилишича, Ўзбекистонда мавжуд амалдаги қонунчилик бўйича давлат активларини аукцион, танлов, биржа савдолари каби оммавий савдолар орқали сотилиши белгиланган. Айрим объектлар уни тезроқ ишга тушириш, лойиҳани ижтимоий аҳамиятидан келиб чиқиб, фақатгина Ўзбекистон Президенти ва Вазирлар Маҳкамасининг қарорларига асосан истисно тариқасида тўғридан-тўғри сотилиши мумкин.
Лекин улар умумий сотилаётган объектлар сонига нисбатан жуда ҳам кам миқдорни ташкил этиши, улар узоқ йиллар давомида фаолият кўрсатмай келаётган ёки бўш турган корхона ва объектлар эканлиги таъкидланган.
Тошкент шаҳри Амир Темур хиёбони Бухоро ва Нуронийлар кўчалари кесишувида жойлашган газеталар ишлаб чиқариш мажмуасининг бўш турган бинолар қисми ҳамда Бухоро кўчаси, 10-уй манзилида жойлашган собиқ Свердлов номидаги концерт зали бинолари эса фойдаланилмай, эски кўринишга келиб қолган ва шаҳар кўркини бузиб турган бинолар ҳисобланади.
Агентликка айнан ушбу объектларга Forsa Barsa томонидан 5 йил муддат ичида 15 миллион доллар миқдорида инвестиция киритиш, уларни тўлиқ реконструкция қилиш мажбуриятини олган ҳолда объектлар негизида гастрол-концерт фаолиятини ташкил этиш ва камида 150 та янги иш ўрнини яратиш шарти билан тўғридан-тўғри сотиб олиш бўйича мурожаат келиб тушган. Лекин бу таклифлар рад этилган.
«Ушбу объектлар оммавий савдолар орқали сотилади ва энг яхши таклиф берган инвестор унга эга бўлади», — дейилади агентлик баёнотида.
Изоҳ (0)