Тошкентдаги кичик ҳалқа йўлининг Шайхонтоҳур туманидан ўтган қисмида 5 июнь куни оммавий пичоқбозлик юз бергани, икки киши жароҳатлангани ҳақида хабар берилган эди. Кейинроқ можаро иштирокчиларидан бири олган тан жароҳатлари оқибатида вафот этгани маълум бўлганди. Пойтахт ИИБ матбуот хизматининг хабари қилишича, пичоқбозлик иштирокчиларидан яна бири оғир аҳволда.
«Шифокорларнинг саъй-ҳаракатларига қарамай, келишмовчилик иштирокчиларидан бири шифохонада ҳаётдан кўз юмди. Шифокорлар иккинчи йигитнинг ҳолатини оғир деб баҳоламоқда. Яна икки нафар йигитга ҳам оғир тан шикастлари етган», — дейилади хабарда.
Маълумотларга кўра, жанжал 27 ёшли Д.М. бизнес ҳамкори — 1988 йилда туғилган Б.Р. билан Тошкентнинг Лутфий кўчасида жойлашган дорихонадан тушадиган даромад сабаб пайдо бўлган келишмовчиликдан юзага келган.
Мазкур факт асосида Тошкент шаҳар прокуратураси томонидан Жиноят кодексининг 97-моддаси (Қасддан одам ўлдириш) бўйича жиноий иш қўзғатилди. Дастлабки тергов билан прокуратура органлари шуғулланмоқда.
Таъкидланишича, ҳодисага алоқадор бир нечта шахс қўлга олинган. Қолганларнинг шахсларини аниқлаш ва қўлга олиш чоралари кўрилмоқда.
Изоҳ (0)