Тошкент шаҳрида 9—10 июнь кунлари шамол, қисқа муддатли ёмғир ва момақалдироқ кутилмоқда. Шамол тезлиги сониясига 12-17 метргача етиши мумкин. Бу ҳақда Тошкент шаҳар ҳокимлиги маълум қилди.
Хабар берилишича, шамол дарахтлар ва шохларни синдириши, мустаҳкам ўрнатилмаган конструкцияларни ўрнидан қўзғатиши мумкин. Бунинг натижасида, уларнинг остидаги одамлар ва автотранспорт воситаларига шикаст етиши мумкин.
Шаҳар ҳокимлиги барча тошкентликлар ва пойтахт меҳмонларидан кучли шамол кузатилганида кўчада ҳаракатланмасликни, автомобилларни дарахтлар ва бошқа турли мустаҳкам бўлмаган конструкциялардан узоқроқ, хавфсиз жойга қўйишни сўрамоқда.
Аввалроқ Хоразмдаги кузатилган кучли шамолдан электр тармоқларига жиддий зарар етгани ҳақида хабар берилганди.
Эслатиб ўтамиз, Тошкент шаҳрида 2020 йилнинг 8 апрель куни кузатилган кучли шамол ва қор 6968 та дарахтга зарар етказганди.
Бухоро вилоятида апрель ойининг охирида кузатилган кучли шамол эса кўчада бўлган бир кишининг умрига зомин бўлганди.
Изоҳ (0)